قازاقستانداعى ەڭ ۇزىن پوليتسەي: بويىمنىڭ ۇزىندىعى جۇمىسىما كومەكتەسەدى
ءتول مەرەكەسىنە وراي ب ق و پوليتسيا دەپارتامەنتى پاترۋلدىك پوليتسيا باتالونىنىڭ ينسپەكتورى، پوليتسيا كاپيتانى اباي بالابايەۆپەن قازاقپارات ءتىلشىسى اڭگىمەلەسكەن ەدى.
- اباي اياپبەرگەن ۇلى، كاسىبي مەرەكەڭ قۇتتى بولسىن، الدىمەن ءوز ءومىرىڭ تۋرالى ايتىپ بەرسەڭ؟
- مەن 1993 -جىلى 24-قاراشادا الماتى قالاسىندا ءومىر ەسىگىن اشتىم. كەيىن اكەم اياپبەرگەن بالاباي ۇلى يسقاقوۆ ورالدان بولعاننان كەيىن وسىندا كوشىپ كەلدىك. اكەم كاسىپكەر بولسا، انام گۇلميرا قازاقباي قىزى «قازپوشتا» ا ق بولىمشەسىندە اعا كاسسير رەتىندە قىزمەت ەتەدى. 2012 -جىلى اقتوبە زاڭ ينستيتۋتىنا وقۋعا ءتۇسىپ، 2016 -جىلى ءتامامدادىم. سول جىلدان باستاپ ورال قالاسىندا ۋچاسكەلىك پوليتسيا ينسپەكتورى قىزمەتىن اتقاردىم. وتكەن جىلدىڭ قىركۇيەگىندە پاترۋلدىك پوليتسيا باتالونىنا اۋىستىم. بۇدان ون جىل بۇرىن بويىم 193 سانتيمەتر بولسا، قازىر 207 سانتيمەترگە جەتتى. اياقكيىم ولشەمى - 45. سوندىقتان كيىمدى ارنايى تاپسىرىس بويىنشا تىكتىرۋگە تۋرا كەلەدى. ۇيلەنىپ، وتاۋ قۇرعانمىن، جولداسىم، ەكى بالام بار.
- بويدىڭ ۇزىندىعى قىزمەتىڭە كەدەرگى كەلتىرمەي مە؟
- جوق، كەلتىرمەيدى، قايتا كومەكتەسەدى دەپ ايتار ەدىم. مىسالى، بۇرىن قۇقىق بۇزۋشىلاردى ۇستاۋ كەزىندە ولار بويدىڭ ۇزىندىعىنان دا سەسكەنەدى. بىردە مىناداي وقيعا بولدى. 2020 -جىلى بولۋى كەرەك، اناسى كىشكەنتاي قىزىمەن دۇكەنگە كەتكەن. اناسىمەن سوزگە كەلدى مە ەكەن، كامەلەتكە تولماعان ۇلكەن قىزى پاتەردى ىشىنەن كىلتتەپ، ەسىكتى اشپاي قويعان. پاتەر ەكىنشى قاباتتا ەكەن. شاقىرتۋ بويىنشا كەلگەن مەن جەرتولەنىڭ توبەسىنە شىعىپ، ودان بالكونعا ءوتىپ، ىشكە كىردىم. قىز جىلاپ وتىر ەكەن. سوسىن پسيحولوگتى شاقىردىق. ايتەۋىر جاس ءوسپىرىم قىز زارداپ شەككەن جوق. مىنە، مەن بويىمنىڭ ۇزىندىعىن سوندا كورگەنمىن. كەيدە جۇمىس بابىمەن كەزدەسكەن ادامدار تاڭعالادى. اسىرەسە، بالالار اتا-انالارىنا: «بويى ۇزىن پوليتسەيدى قارا!» دەپ ايتىپ جاتادى. كۇلەمىن دە قويامىن.
- اباي، سپورتپەن دە اينالىساتىن شىعارسىڭ؟
- ءيا، ۆولەيبولمەن، تاەكۆوندومەن اينالىستىم. پوليتسەي بولعاننان كەيىن دەنەڭدى شىنىقتىرىپ، ءار كەزدە بابىڭدا جۇرگەن ماڭىزدى.
- اڭگىمەڭە راحمەت. قىزمەتىڭە تابىس تىلەيمىن.
اۆتور: ەلجان ەرالى
