«التىن وردا» بازارىندا باسەكەلەستىكتى قورعاۋ تالاپتارى ورەسكەل بۇزىلعان - اگەنتتىك

اگەنتتىكتىڭ مالىمەتىنشە، بيىلعى ناۋرىز ايىندا الماتى وبلىسى بويىنشا مونوپولياعا قارسى دەپارتامەنتى «Altyn Orda QazTrade LTD» ج ش س- نىڭ قىزمەتىنە تەكسەرۋ جۇرگىزگەن.

تەكسەرۋ بارىسىندا ساۋدا ورنىن كۇندەلىكتى جالعا الۋ باعاسى جۇك كولىگىنەن 15000 تەڭگە، كاماز جانە MAN اۆتوكولىكتەرىنەن 7000-8000 تەڭگە، Sprinter اۆتوكولىگىنەن 6000-7000 تەڭگە، گازەل اۆتوكولىگىنەن 5000 تەڭگە، جەڭىل اۆتوكولىكتەردەن 3500 تەڭگە ەكەنى انىقتالدى. وسىعان وراي، الماتى وبلىسى بويىنشا مونوپوليامەن كۇرەس دەپارتامەنتى ساۋدا ورىندارىن ۇسىنۋ قىزمەتتەرى نارىعىنداعى باسەكەلەس ورتانىڭ جاي- كۇيىنە تالداۋ جانە باعالاۋ جۇرگىزگەن. تالداۋ ناتيجەسى بويىنشا «Altyn Orda QazTrade Ltd» ج ش س %100 ۇلەسىمەن مونوپوليست ەكەنى، باسەكەلەستىكتى قورعاۋ سالاسىنداعى زاڭنامانى بۇزعانى انىقتالعان.

«تەكسەرۋ قورىتىندىسى بويىنشا 2022 -جىلدىڭ مامىر ايىندا «Altyn Orda QazTrade LTD» ج ش س- نە قاتىستى اكىمشىلىك ءىس قوزعالدى. ماتەريالدار الماتى وبلىسى قاراساي اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنا جولداندى»، - دەلىنگەن باسەكەلەستىكتى قورعاۋ جانە دامىتۋ اگەنتتىگىنىڭ حابارلاماسىندا.

ەسكە سالايىق، بۇعان دەيىن «التىن وردا» بازارىنىڭ يەلەرى 1,5 ميلليارد تەڭگە سالىق تولەگەنىن جانە «التىن وردا» بازارىندا 1,6 ميلليارد تەڭگە كولەمىندە زاڭبۇزۋشىلىق انىقتالعانىن حابارلاعان بولاتىنبىز.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى