قازاقستان حالقىنا قورى قامقورشىلىق كەڭەسىنىڭ ءتوراعاسى اۋىستى
قوردىڭ باسپا ءسوز قىزمەتىنەن ءمالىم ەتكەندەي، يۋريي پيا جۇمىس كولەمىنىڭ جوعارى بولۋىنا بايلانىستى قوردىڭ قامقورشىلىق كەڭەسىنىڭ ءتوراعاسى رەتىندەگى ءوز وكىلەتتىگىن مەرزىمىنەن بۇرىن توقتاتۋ تۋرالى ءوتىنىش بىلدىرگەن.
يۋ. پيا - جوعارى تەحنولوگيالارمەن وتە كۇردەلى كارديوحيرۋرگيا وپەراتسيالارىن جاساپ جۇرگەن الەمگە ايگىلى دارىگەر، قازاقستان ەڭبەك ەرى اتاعىنا يە. قازىر ول «University Medical Center» كورپوراتيۆتىك قورىن باسقارادى.
اتاپ وتىلگەندەي، يۋري پيا قامقورشىلىق كەڭەس قۇرامىندا قالا وتىرىپ، ستراتەگيالىق ماقساتتار مەن مىندەتتەردى جۇزەگە اسىرۋدا قورعا قولداۋ كورسەتۋدى جالعاستىرادى. قوردىڭ قامقورشىلىق كەڭەسىنىڭ جاڭا ءتوراعاسى بولىپ قوعام قايراتكەرى، «اتامەكەن» ۇ ك پ كاسىپكەرلەر قۇقىعىن قورعاۋ جانە سىبايلاس جەمقورلىققا قارسى ءىس- قيمىل جونىندەگى كەڭەستىڭ ءتوراعاسى قايىربەك شوشان ۇلى سۇلەيمەنوۆ سايلاندى. ال قامقورشىلىق كەڭەس ءتوراعاسىنىڭ ورىنباسارى بولىپ مەديتسينا عىلىمدارىنىڭ كانديداتى، قازاقستان دەنساۋلىق ساقتاۋ ءىسىنىڭ ۇزدىگى امانجولوۆا زاۋرەش جۇمانالى قىزى سايلاندى.
