ساۋىسقان، جارما اۋىلدارى قۇم استىندا قالدى
ءۇي اۋلاسىندا ۇيىلگەن قۇمدى كۇرەتۋ ءۇشىن جىلدا تەحنيكا جالدايدى. ال جەرگىلىكتى بيلىكتەن ازىرگە ەشقانداي كومەك جوق.
سازدى اۋىلى شەتپەدەن 90 شاقىرىم قاشىق. 100-دەن استام ادام تۇراتىن ەلدى مەكەنگە كىرەبەرىس جولدى، تىپتەن كەيبىر ۇيلەردى قۇم باسىپ قالعان. قوراسىن قۇم كوشكىنى قۇلاتقان تۇرعىندار دا بار. ماسەلەن، باليان ءابۋوۆا تەحنيكا جالداپ كۇرەتكەنىن ايتادى. مال ۇستالاتىن ورىنجايدى تاستان سالعىزىپتى.
باليان ءابۋوۆا، اۋىل تۇرعىنى:
- قورانى تاستان سالىپ الدىق. ءبىراق بەرگى جاعىن باسىپ جاتىر. قايتا- قايتا سونى اقشاعا كۇرەتىپ وتىرمىز. ءبىر كۇرەتۋىمىزدىڭ ءوزى 500-600 مىڭعا شىعادى.
ال ساۋىسقان، جارما اۋىلدارىن قوسا العاندا 250-دەي تۇرعىن بار. باسىم كوپشىلىگى ءتورت تۇلىك ءوسىرىپ وتىر. اعا بۋىننىڭ ايتۋىنشا، وسى اۋماقتا جەراستى سۋىن يگەرۋ باستالعالى بەرى قۇم كوشكىنى جيىلەي تۇسكەن.
ايداربەك كوركەمبايەۆ، اۋىل تۇرعىنى:
- ساۋىسقان دەگەن كەن ورىنى بار. اۋلىمىزدان جاڭاوزەنگە سۋ ايداپ وتىرعان. سۋ ايداپ وتىرعانىنا 50 جىل بولدى عوي. سول استىنىڭ سۋى ورتايعاسىن مىنا قۇم دەيتىن كوشىپ، اۋىلىمىزدى باسىپ قالدى. ۇيلەرىمىزدى باسىپ قالدى.
«قۇم كوشكىنىن توقتاتۋدىڭ ءبىر امالى وسىمدىك ەگۋ. وعان سۋ دا جەتەدى. جالپى بۇل اۋىلدارعا ينفراقۇرىلىم تارتۋ جاعىنان ماسەلە جوق»، - دەيدى جاۋاپتىلار.
ءبىر ايتا كەتەرلىگى، 5 جىل بۇرىن قۇنى 422 ميلليون تەڭگەلىك جوبا ازىرلەنگەن. سەكسەۋىل ەگىپ، جاسىل قورشاۋ سالۋعا جۇمسالۋى ءتيىس بولعان قاراجات ۋاقىتىندا اۋدارىلماعان. ەندى قازىر اقشا بار. ءبىراق مەردىگەر تابىلماي جاتىر.
ەربول دەنوۆ، وڭىرلىك تابيعي رەسۋرستار جانە تابيعات قورعاۋ باسقارماسىنىڭ ءبولىم باسشىسى:
- 2022 -جىلعا وبلىستىق بيۋدجەتتەن اقشا ءبولىندى. 256 ميلليون تەڭگە قاراستىرىلعان. سول بويىنشا ءبىز جىل باسىنان بەرى ءتورت رەت كونكۋرس جاريالاعان بولاتىنبىز. وكىنىشكە وراي، كونكۋرسقا ەشكىم قاتىسپادى. سوسىن وتپەدى دەپ تانىلدى. بيىل مەملەكەتتىك ساتىپ الۋ كونكۋرسى تاعى وتكىزىلەدى. ەگەر قاتىساتىندار تابىلماسا، باستاپقى جوباعا تۇزەتۋ ەنگىزىلەدى. ال شالعايداعى 3 اۋىل تۇرعىندارىنا توزىمدىلىك تانىتىپ، كۇتە تۇرۋدان باسقا امال جوق.
www.24.kz
