قازاقستاننىڭ ۇزدىك مەديتسينالىق ۇيىمدارى ماراپاتتالدى
سالتاناتتى كەشتە دەنساۋلىق ساقتاۋ ءمينيسترى اجار عينيات ەلىمىزدىڭ ۇزدىك مەديتسينالىق ۇيىمدارىنا مۇسىنشەلەردى تابىس ەتتى. ول ەلىمىزدىڭ مەديتسينا قىزمەتكەرلەرىن كاسىبي مەرەكەلەرىمەن قۇتتىقتاپ، ولاردىڭ قوعامداعى ەرەكشە ءرولىن اتاپ ءوتتى.
ماسەلەن، «مەديتسينالىق- سانيتارلىق العاشقى كومەكتىڭ ۇزدىك مەديتسينالىق ۇيىمى» نوميناتسياسىندا كوكشەتاۋ قالاسىنىڭ ەمحاناسى جەڭىسكە جەتتى. ەمحاناعا 33 جىلدا كوكشەتاۋ قالاسى مەن اقمولا وبلىسىنىڭ 91 مىڭنان استام تۇرعىنى تىركەلگەن.
نۇر-سۇلتان قالاسى اكىمدىگىنىڭ 2№ قالالىق كوپبەيىندى اۋرۋحاناسى - تۇرعىندارعا 24/7 تاۋلىك بويى شۇعىل جانە جوسپارلى مەديتسينالىق كومەك كورسەتەتىن ءىرى كوپبەيىندى ەمدەۋ- دياگنوستيكالىق مەكەمەلەردىڭ ءبىرى، ول «قالانىڭ ۇزدىك ستاتسيونارى» بولىپ تانىلدى.
«ۇزدىك كوپبەيىندى وبلىستىق اۋرۋحانا» اتاعىنا تۇركىستان ءوڭىرىنىڭ وبلىستىق كلينيكالىق اۋرۋحاناسى لايىقتالدى. ونىڭ 27 كلينيكالىق بولىمشەسى، 2 انەستەزيولوگيا جانە رەانيماتولوگيا بولىمشەسى، 5 ەمحانا، ونىڭ ىشىندە ونكولوگيا ورتالىعى جانە پاراكلينيكالىق بولىمشەلەرى بار.
ALTYN SHIPAGER سىيلىعىنىڭ نۇسقاسى بويىنشا «ەڭ ۇزدىك اۋداندىق اۋرۋحانا» بولىپ قاراعاندى وبلىسى اباي اۋدانىنىڭ ورتالىق اۋداندىق اۋرۋحاناسى جاريالاندى. مەكەمە ءۇش رەت «سالا كوشباسشىسى» ۇلتتىق سەرتيفيكاتىن العان.
«ۇزدىك جەدەل مەديتسينالىق جاردەم ستانتسياسى» اتالىمىندا پاۆلودار وبلىستىق جەدەل مەديتسينالىق جاردەم ستانتسياسى توپ جاردى. مەكەمە 789 مىڭنان استام ادامعا قىزمەت كورسەتەدى جانە قىزمەت كورسەتۋ راديۋسى 180 شاقىرىمعا جەتەدى. بۇل رەتتە تاۋلىك سايىن ستانتسيا پۋلتىنە 1500-1800 قوڭىراۋ كەلىپ تۇسەدى، ال جەلىگە 70 بريگادا شىعادى. ستانتسيا بازاسىندا قىزمەتكەرلەردى ۇزدىكسىز وقىتۋ ءۇشىن زاماناۋي جاتتىعۋ قۇرىلعىلارى بار سيمۋلياتسيالىق ورتالىق جابدىقتالعان.
جامبىل وبلىستىق كوپسالالى بالالار اۋرۋحاناسى «ۇزدىك وبلىستىق بالالار اۋرۋحاناسى» نوميناتسياسىن الدى. مەكەمە 1965-جىلى قۇرىلعان جانە وندا 100 توسەك-ورنى بار حيرۋرگيالىق بلوك اشىلعان. بۇگىندە اۋرۋحانانىڭ الەۋەتى بالالاردى قورعاۋدىڭ نەگىزگى بەيىندى باعىتتارى بويىنشا 550 دەن استام توسەك-ورىندى قۇرايدى.
سونىمەن بىرگە، 360 توسەك ورنى بار الماتى قالاسىنىڭ 2№ بالالار قالالىق كلينيكالىق اۋرۋحاناسى «قالانىڭ ۇزدىك بالالار ستاتسيونارى» بولىپ تانىلدى. اۋرۋحانا ەلۋ جىلدان استام تاريحىندا كوپتەگەن وزگەرىسكە ۇشىراپ، جاڭا جابدىقتارمەن جانە جوعارى بىلىكتى كادرلارمەن جابدىقتالعان زاماناۋي كلينيكاعا اينالعان.
2019-جىلى اقتوبە وبلىسىندا اشىلعان «ايالا» بالالاردى وڭالتۋ ورتالىعى «ۇزدىك بالالاردى وڭالتۋ ورتالىعى» سىيلىعىن الدى. ورتالىقتا جىل سايىن اۋىر نيەۆرولوگيالىق اۋرۋلارى بار، ونىڭ ىشىندە بتسپ، تۋا بىتكەن دامۋ كەمىستىگى بار، سونداي-اق اۋىر كارديوحيرۋرگيالىق، تراۆماتولوگيالىق، نەيروحيرۋرگيالىق وپەراتسيالاردان كەيىن 2 مىڭنان استام بالا وڭالتۋ ەمىن الادى.
ودان بولەك، تۇركىستان وبلىسىنىڭ 1№ وبلىستىق پەريناتالدىق ورتالىعى «ەڭ ۇزدىك بوساندىرۋ ۇيىمى» اتاندى. مەكەمە تەك ءوڭىردىڭ عانا ەمەس، قازاقستاننىڭ دا ءىرى پەريناتالدىق ورتالىقتارىنىڭ ءبىرى بولىپ سانالادى. بۇل ۇيىمدا 300 توسەك-ورىن، 600 دەن استام قىزمەتكەر بار. جىل سايىن ورتالىقتا 10 مىڭنان استام نارەستە دۇنيەگە كەلەدى. سوڭعى ەكى جىلدا ورتالىقتا بىردە-ءبىر انا ءولىمى تىركەلگەن جوق.
«ۇزدىك مەديتسينالىق كوللەدج» سىيلىعى پاۆلودار مەديتسينالىق جوعارى كوللەدجىنە بەرىلدى. مەكەمە 70-جىلدان استام تاريحى بار وبلىستىڭ كونە وقۋ ورىندارىنىڭ ءبىرى. 2021-جىلدىڭ مامىر ايىندا كوللەدج ەۋرازيالىق اككرەديتتەۋ جانە ءبىلىم بەرۋ مەن دەنساۋلىق ساقتاۋ ساپاسىن قامتاماسىز ەتۋ ورتالىعىنىڭ (ECAQA) حالىقارالىق ينستيتۋتسيونالدىق جانە مامانداندىرىلعان اككرەديتتەۋىنەن وتكەن.
«ۇزدىك مەديتسينالىق جوعارى وقۋ ورنى» سىيلىعىن سانجار اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتى جەڭىپ الدى، 91-جىلدان بەرى بۇل وقۋ ورنى قازاقستان مەن ورتالىق ازيادا مەديتسينا ماماندارىن دايارلاۋ ءۇشىن جەتەكشى جوعارى وقۋ ورنىنىڭ بەلگىسىن ساقتاپ كەلەدى. 2021-2022-جىلدارى ۋنيۆەرسيتەت QS World University Ranking الەمدىك ۋنيۆەرسيتەتتەردىڭ ەليتالىق رەيتينگىنىڭ قۇرامىنا كىرگەن.
ماسعۇت ايقىمبايەۆ اتىنداعى ۇلتتىق عىلىمي اسا قاۋىپتى ينفەكتسيالار ورتالىعى «دەنساۋلىق ساقتاۋدىڭ ەڭ ۇزدىك عىلىمي ۇيىمى» نوميناتسياسىندا جەڭىسكە جەتتى. بۇل ۇيىم 73 جىل بويى ەلدىڭ بيولوگيالىق قاۋىپسىزدىگىن قامتاماسىز ەتۋمەن، مونيتورينگتىڭ، پروفيلاكتيكانىڭ عىلىمي نەگىزدەرىن ازىرلەۋمەن جانە ەنگىزۋمەن، قر اۋماعىندا ادامداردىڭ اسا ءقاۋىپتى ينفەكتسيالاردى جۇقتىرۋ قاۋپىن باعالاۋمەن اينالىسادى.
