جۇرت ناقتى وزگەرىستەردىڭ قازىر بولعانىن قالايدى - پرەزيدەنت
«كونستيتۋتسيالىق وزگەرىستەر، وسىلايشا، كەزەڭ-كەزەڭىمەن قولدانىلا بەرمەك. جاڭارعان كونستيتۋتسيا تولىققاندى قولدانىسقا ەنۋى ءۇشىن ءالى كوپ جۇمىس ىستەۋىمىز كەرەك. ءبىز 20 دان استام جاڭا زاڭ جوباسىن ازىرلەپ، قابىلداۋىمىز قاجەت»، - دەدى مەملەكەت باسشىسى.
پرەزيدەنت سونداي-اق، سايلاۋ تۋرالى، ساياسي پارتيالار تۋرالى جانە باسقا دا ءبىرقاتار زاڭدار وزگەرەتىنىن ەرەكشە اتادى.
«سايلاۋ تۋرالى، ساياسي پارتيالار تۋرالى جانە باسقا دا ءبىرقاتار زاڭداردى وزگەرتەمىز. بۇل ەلدى تابىستى جاڭعىرتۋ تۇرعىسىنان وتە ماڭىزدى. زاڭداردى قابىلداۋ ءۇشىن بىرنەشە اي، ءتىپتى، جارتى جىل ۋاقىت قاجەت بولۋى مۇمكىن. ءبىراق، رەفورمانى سوزىپ، ارقانى كەڭگە سالۋعا بولمايدى. جۇرت ناقتى وزگەرىستەردىڭ ءقازىر بولعانىن قالايدى. سوندىقتان، دەپۋتاتتارىمىز نەگىزگى زاڭ جوبالارىن وسى كەزدەن جيناقتاي بەرۋى كەرەك. سوسىن كۇزگى سەسسيا باستالعاندا بىردەن ىسكە كىرىسكەن ءجون.
باستى زاڭدار جىل سوڭىنا دەيىن قابىلدانۋعا ءتيىس. سوندا عانا جان-جاقتى جاڭعىرۋدى جوعارى قارقىنمەن جالعاستىرا الامىز»، - دەدى قاسىم-جومارت توقايەۆ.
ايتا كەتەيىك، پرەزيدەنت ۇلىتاۋ وبلىسىنا جۇمىس ساپارى اياسىندا ۇلتتىق قۇرىلتايدىڭ العاشقى وتىرىسىنا قاتىسىپ جاتىر.
كەشە مەملەكەت باسشىسىنىڭ ۇلتتىق قۇرىلتاي قۇرۋ تۋرالى جارلىعى جاريالاندى.
ۇلتتىق قۇرىلتايدىڭ قازىرگى قۇرامىندا ءماجىلىس دەپۋتاتتارى مەن قحا مۇشەلەرىنەن، ازاماتتىق قوعام مەن ساياسي پارتيا وكىلدەرىنەن، ساراپشىلار مەن وڭىرلەردەگى قوعامدىق كەڭەس مۇشەلەرىنەن، كاسىپكەرلەردەن جاساقتالعان 117 ادام بار.
