باپكەرى نەگە قانات يسلامنىڭ كارەراسىن اياقتامايتىنىن ايتىپ بەردى
اڭگىمە بارىسىندا مامان وليمپيادا جۇلدەگەرى اتانعان بوكسشىنىڭ جوسپارلارى تۋرالى دا ايتتى.
ەسكە سالايىق، يسلام سوڭعى كەزدەسۋىن اقپان ايىندا پلانت-سيتي (فلوريدا شتاتى، ا ق ش) قالاسىندا دجيممي كەلليگە (26-2، 10 ك و) قارسى وتكىزدى. ورتا سالماقتا WBO Global بەلبەۋى ساراپقا سالىنعان بۇل ايقاستا قازاقستاندىق بوكسشى تورەشىلەردىڭ شەشىمى بويىنشا جەڭىلدى. ەندى يسلام جازدا شارشى الاڭعا قايتا ورالۋعا نيەتتى.
«مەنىڭ ويىمشا، يسلام الەم چەمپيونى بولادى. قازىر ول وكسنارد قالاسىندا. مەنىمەن بىرگە دايىندالۋدا. سوڭعى جەڭىلىس - قاناتتىڭ شىن مانىندە قانداي بوكسشى ەكەنىن كورسەتپەيدى. اقىرعى جەپكە-جەگى كەزىندە ونىڭ كومانداسى بولمادى. ەندى بۇل جەڭىلىستەن ساباق شىعارامىز. اقىلداسامىز. دۇرىس دايىن بولمادى. بۇدان بۇلاي ءبىزدىڭ كوماندا مۇنداي جاعداي بولعىزبايدى.
قازىرگى ۋاقىتتا ونىڭ كەلەسى كەزدەسۋى تۋرالى كەلىسسوز وتۋدە. جەكپە-جەكتىڭ ناقتى قاشان وتەتىنى بەلگىسىز. جۋىردا بارلىعىن بىلەمىز. مەنىڭ ماقساتىما كەلەتىن بولساق، قاناتتى جاقسىلاپ دايىنداۋ. مەنىڭ ارىپتەسىم سيسيليو فلورەس - فيزيكالىق دايىندىققا جاۋاپ بەرەتىن مىقتى مامان. ول ۆاسيلي لوماچەنكو مەن سەرحيو مارتينەسكە كومەكتەسكەن. مەن دە كوپتەگەن چەمپيوندارمەن جۇمىس ىستەگەنمىن. سوندىقتان تاجىريبەمىز بار. سول تاجىريبەنى قانات يسلامعا بەرەمىز. ول ءبىزدىڭ باۋىرىمىز سەكىلدى. ءبىز جاقسىلاپ كومەكتەسىپ، قايتا جوعارى دەڭگەيگە كوتەرەمىز»، - دەدى رومو.
ال كەللي بولسا وتكەن اپتادا ءبىر كەزدەسۋ وتكىزىپ ۇلگەردى. ول مەكسيكالىق حايمە مۋنگيامەن (40-0، 32 KO) ءبىرىنشى ورتا سالماقتا جولىعىپ، بەسىنشى راۋندتا نوكاۋتپەن جەڭىلدى.
