كيىكتەردى اتۋعا رۇقسات بەرىلۋى مۇمكىن – مينيستر
«كيىكتەردى اتۋعا رۇقسات بەرىلۋى مۇمكىن. ەگەر ءبىزدىڭ عالىمدار كيىك سانىن رەتتەۋگە رۇقسات بەرەتىن بولسا، قازىر جۇمىس توبىمەن بۇكىل سۇراقتاردى قاراستىرىپ جاتىرمىز»، - دەدى ەكولوگيا ءمينيسترى ءماجىلىس وتىرىسىنان كەيىن تىلشىلەرگە بەرگەن سۇحباتىندا.
ونىڭ ايتۋىنشا، بيولوگيالىق نەگىزدەمە قازاقستاننىڭ بارلىق اۋماعىنا - بەتپاقدالا، ءۇستىرت جانە ورال پوپۋلياتسيالارىنا تارالادى.
«قازىر نەگىزگى ماسەلە باتىس قازاقستان وبلىسى بويىنشا بايقالىپ وتىر. ويتكەنى، كيىكتەر قازىر اۋىل شارۋاشىلىعى تاۋارىن وندىرۋشىلەردىڭ ەگىستىكتەرىنە شىعىپ جاتىر. سوندىقتان مۇندا بەلگىلى ءبىر ماسەلە بار. ءتىپتى ماسەلە مۇندا عانا ەمەس. عالىمدارىمىزدىڭ كيىك سانىن رەتتەۋ قاجەت دەگەن ۇسىنىسى بار. بۇل پوپۋلياتسيانىڭ ءوزىن قورعاۋ ءۇشىن دە قاجەت. قازىر باسپا ءسوزدى دە ءجىتى وقىپ وتىرمىز. وندا ءبىزدى قىزىل كىتاپقا ەنگەن كيىكتەردى اتۋعا رۇقسات بەرىپ، اڭشىلىق شارۋاشىلىقتاردىڭ مۇددەسىن قورعاپ وتىر دەپ جاتىر. بىرىنشىدەن، كيىك قىزىل كىتاپقا ەنگىزىلمەگەن. ول جويىلىپ بارا جاتقان ءتۇر رەتىندە قاراستىرىلادى. 2016 -جىلدان باستاپ بىزدە 110 مىڭ كيىك بولدى. بۇگىنگى تاڭدا ولاردىڭ سانى 1 ميلليون 318 مىڭعا جەتتى، ءبىز پوپۋلياتسيانى ساقتاپ قالدىق. قولدان كەلگەننىڭ ءبارىن جاسادىق. ەندى بۇل پوپۋلياتسيانى رەتتەيتىن ۋاقىت كەلدى»، - دەدى س. برەكەشيەۆ.
سونىمەن بىرگە، تىلشىلەر كيىك سانىن قالاي رەتتەۋگە بولاتىنىن سۇرادى.
«قازىر بيونەگىزدەۋ اياقتالادى. ودان كەيىن كيىك سانىن رەتتەۋگە ناقتى ليميت بەلگىلەنەدى. بۇل رەتتەۋدىڭ ىشىندە وسى جانۋارلاردى اتۋ دا بار. قايتالاپ ايتامىن - بۇل شەشىم تەك بيولوگيالىق عىلىمي نەگىزدەمەدە قابىلدانادى. ليميت قاتاڭ تۇردە انىقتالادى. قازىر جۇمىس توبى قۇرىلدى، بۇل ماسەلە جۇمىس توبىندا قاراستىرىلىپ جاتىر. جۇمىس توبىنا بارلىق مۇددەلى مەملەكەتتىك ورگانداردىڭ، باس پروكۋراتۋرانىڭ، ءى ءى م وكىلدەرى كىرەدى. ءبىز براكونەرلىكتى زاڭداستىرۋعا جول بەرمەۋ ءۇشىن بارلىق جۇمىستى جاساپ جاتىرمىز. بارلىق ماسەلەلەر جان- جاقتى قاراستىرىلادى. مەنىڭ ويىمشا، تەكسەرىلگەن ناقتى شەشىم بولادى»، - دەدى سەرىكقالي برەكەشيەۆ.
اۆتور: ايجان سەرىكجان قىزى
