قازاقستاندا ەلەكتر ساموكاتپەن جۇرەتىندەردەن جۇرگىزۋشى كۋالىگى تالاپ ەتىلە مە
ىشكى ىستەر مينيسترلىگى اكىمشىلىك پوليتسيا كوميتەتى ءتوراعاسىنىڭ ورىنباسارى جاندوس مۇراتاليەۆ ەلەكتر ساموكاتتاردىڭ قوزعالىسىنا رۇقسات ەتىلەتىن جولدارعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.
بۇگىن ەلوردادا وتكەن باسپا ءسوز ءماسليحاتىندا تىلشىلەر ج. مۇراتاليەۆتەن جىلدامدىعى ساعاتىنا 25 شاقىرىمنان اساتىن ەلەكتر ساموكاتتارىن باسقاراتىن ادامداردان جۇرگىزۋشى كۋالىگىن تالاپ ەتۋ مۇمكىندىگىنە قاتىستى سۇراق قويدى.
«ولارعا جۇرگىزۋشى كۋالىگى كەرەك ەمەس. سەبەبى ۆەلوسيپەدپەن جۇرەتىندەردەن دە وسىنداي قۇجاتتى تالاپ ەتپەيمىز. ەلەكتر ساموكات ستاندارتىن ەنگىزگەننەن كەيىن، ءبىز جول ەرەجەسىندە دە ءتيىستى وزگەرىستەردى ەسكەرەمىز. وندا ساموكاتپەن قاي جەردە جۇرگۋگە بولاتىنىن، بالالار قاي جاستان باستاپ ونى باسقارا الاتىنىن بەلگىلەيمىز. ەلەكتر ساموكاتتارىنىڭ سانى كۇرت ارتۋىنا وراي لايىقتى جولدار دا سالىنا باستايدى»، - دەدى كوميتەت باسشىسىنىڭ ورىنباسارى.
ونىڭ ايتۋىنشا، اۆتوكولىك جولدارىنىڭ وڭ جاق جيەگىندە ەلەكتر ساموكاتتارىمەن 14 جاسقا تولعان بالالارعا جۇرۋگە رۇقسات بەرىلۋى مۇمكىن.
«اۆتوكولىك جۇرگىزۋشىلەرى دە ەلەكتر ساموكاتپەن جۇرەتىن ادامداردىڭ قاۋىپسىزدىگىن نازارعا الۋى كەرەك. 14 جاسقا تولماعان بالانىڭ ەلەكتر ساموكاتپەن اۆتوكولىك جولدارىنا شىعۋىنا رۇقسات بەرمەيمىز. مۇنداي دەرەكتەر تىركەلسە، پوليتسيا شارا قولدانادى. 14 جاسقا تولماعان بالا ساياباق ىشىندە، كوشەگە شىقپايتىن ورىنداردا جۇرە الادى»، - دەدى كوميتەت باسشىسىنىڭ ورىنباسارى.
بۇدان بۇرىن حابارلانعانداي، قازاقستاندا ەلەكتر ساموكاتتاردى پايدالانۋدىڭ ۇلتتىق ستاندارتىنىڭ جوباسى ازىرلەندى.
اتالعان ستاندارت ساموكاتتاردىڭ جىلدامدىعى مەن باسقا دا قاۋىپسىزدىك تالاپتارىنا سايكەستىگىن رەتتەيدى. وسى ورايدا بۇل قۇرىلعىلاردا مىندەتتى تۇردە جارىق شامدارىنىڭ بولۋى سياقتى تالاپتار ەسكەرىلەدى.
وسى ستاندارتتىڭ اياسىنا جىلدامدىعى ساعاتىنا 25 شاقىرىمنان اسپايتىن ەلەكتر ساموكاتتارى قامتىلادى.
جاندوس مۇراتاليەۆ جىل سايىن ەلەكتر ساموكاتتارىنا قاتىستى جول-كولىك وقيعالارىنىڭ سانى ارتىپ كەلە جاتقانىن ايتتى. سونىمەن قاتار ول ساموكاتتاردىڭ جاياۋ جۇرگىنشىلەر جولاعىمەن قوزعالعانىنا قارسى ەكەنىن ايتتى.
