كابينەتىم دە، كرەسلوم دا جوق، جالاقىمدى ءالى بىلمەيمىن - ساياسات نۇربەك
«مەندە كابينەت پەن عيمارات تا، كرەسلو دا، قىزمەتكەر دە جوق. كرەسلونى ءالى تابۋ كەرەك. كابينەتتى ەندى بەرەدى. ازىرشە، ءبىز بۇرىنعى ءبىلىم جانە عىلىم مينيسترلىگىنىڭ عيماراتىندا وتىرمىز. بۇگىندە مينيسترلىكتى ەكىگە ءبولۋ جۇمىستارى باستالدى. ءبىراق بۇل ءسال كۇردەلى پروتسەسس. بىزگە قازىر ۇلكەن اكىمشىلىك اۋىرتپاشىلىق تۇسەدى»، - دەدى مينيستر.
س. نۇربەك ءبىرىنشى ماقسات - مينيسترلىكتى قۇرىپ الۋ ەكەنىن، ءالى جۇمىس كوپ ەكەنىن ايتتى. «بيىل مەن 41 جاسقا تولدىم. سوڭعى 15 جىلدا جيناعان بارلىق ۇسىنىستاردى جيناقتاپ، ءوز باستامالارىمدى جۇزەگە اسىرۋعا ومىرىمدە ءبىرىنشى رەت مۇمكىندىك بەرىلدى. ءبىر جاعىنان ىشتەي قوبالجىپ تۇرمىن. ۇلكەن ءۇمىت تە بار. حالقىمىزعا قىزمەت ەتىپ، ەڭ باستىسى پرەزيدەنتتىڭ سەنىمىن اقتاۋ كەرەك. جالاقىمدى شىن بىلمەيمىن. مەنىڭ كەلىسىمشارتىم ءالى جوق. زاڭ تۇرعىسىنان مينيسترلىك (عىلىم جانە جوعارى ءبىلىم مينيسترلىگى - رەد. ) ءالى قۇرىلعان جوق. ۇكىمەتتىڭ قاۋلىسىن دايىنداپ، جۇمىستى وزىمە قابىلداۋىم كەرەك»، - دەدى س. نۇربەك.
بۇعان دەيىن عىلىم ءمينيسترى وتباسىنىڭ كيپردەن ورالىپ، بالالارىنىڭ قازاقستانداعى قاتارداعى مەكتەپكە باراتىنىن ايتقان ەدى. سونداي-اق، بۇگىن ۇكىمەت وتىرىسىندا عىلىم جانە جوعارى ءبىلىم ءمينيسترى لاۋازىمىنا تاعايىندالعان ساياسات نۇربەك سالتاناتتى تۇردە انت بەردى.
