دارىگەرلەر قاجىلىققا باراتىنداردى مەنينگوكوكقا قارسى ەكپە الۋعا شاقىردى
ءمالىم ەتىلگەندەي، قاجىلىقتان ورالعانداردىڭ اتالعان ىندەتتى ەلگە اكەلۋ قاۋپى بار. 2020- جانە 2021-جىلدارى كىشى جانە ۇلكەن قاجىلىققا نيەتتەنگەندەر كوروناۆيرۋس پاندەمياسىنان بۇل ءراسىمدى ورىنداۋدان باس تارتۋعا ءماجبۇر بولدى.
سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعىنىڭ ديرەكتورى ايناگۇل قۋاتبايەۆانىڭ ايتۋىنشا، مەنينگوكوكك جۇقپاسىنىڭ ءورشۋى 2000- جىلى بولدى. ول ۋاقىتتا قاجىلىققا بارعان 18 ەلدىڭ ازاماتتارىنان جانە ولاردىڭ جاقىندارىنان مەنينگوكوكك ينفەكتسياسىنىڭ 400 دەن استام وقيعاسى انىقتالدى.
«2018-جىلى ەلدە مەنينگوكوكك ينفەكتسياسى تىركەلدى. وندا رەسمي ستاتيستيكا بويىنشا 96 ادام ىندەت جۇقتىردى، ونىڭ 45 ءى - 18 جاسقا دەيىنگى بالالار. ياعني قاجى تەك ءوزىنىڭ دەنساۋلىعىنا ەمەس، سونىمەن بىرگە وتباسىنىڭ، دوستارىنىڭ، ارىپتەستەرىنىڭ، تۋىستارىنىڭ دەنساۋلىعىنا دا قاۋىپ توندىرەدى. قاجىلىققا باراتىن ەر ادامدار اراسىندا ينفەكتسيا جۇقتىرۋ %86 دەيىن جەتەدى»، - دەدى دارىگەر.
سپيكەردىڭ سوزىنشە، بيىل ەپيدەميولوگيالىق احۋال قولايلى. بەس ايدا مەنينگوكوكك ينفەكتسياسىنىڭ تەك 11 جاعدايى انىقتالدى. 2006-جىلدان بەرى قازاقستان مۇسىلماندارى ءدىني باسقارماسى مەن ساۋد ارابياسىنىڭ قاجىلىق مينيسترلىگى اراسىندا كەلىسىم بار. وعان سايكەس قاجىلار ەلدەن شىقپاس بۇرىن مىندەتتى تۇردە مەنينگوكوكقا قارسى ەكپە الۋى ءتيىس.
2022-جىلى ۆاكتسيناتسيانى ەلىمىزدىڭ سەگىز وڭىرىندە - اتىراۋ، جامبىل، قاراعاندى، قىزىلوردا، ماڭعىستاۋ وبلىستارىندا، سونداي-اق نۇر-سۇلتان، الماتى جانە شىمكەنت قالالارىندا جۇرگىزۋ جوسپارلانعان.
ايتا كەتەيىك، بۇل ينفەكتسياعا قارسى ەكپە اقىلى، قۇنى 26 - 46 مىڭ تەڭگە ارالىعىندا. قاجىلىققا بارۋعا COVID-19 قارسى ۆاكتسينالانعان 65 جاسقا دەيىنگى ادامدارعا رۇقسات ەتىلەدى.
ەسكە سالايىق، بيىل ساۋد ارابياسى ەلىمىزدەن 3 مىڭ ادامعا قاجىلىق پارىزدى وتەۋگە رۇقسات بەرگەنىن جازعان بولاتىنبىز. ق ر مادەنيەت جانە سپورت مينيسترلىگىنىڭ مالىمەتىنە سايكەس، 3 مىڭ كۆوتا كونكۋرس تالاپتارىنا سايكەس كەلگەن 14 تۋروپەراتور اراسىندا ءبولىندى.
