ەلوردادا مەديتسينا قىزمەتتەرىنىڭ باسىم بولىگى اۆتوماتتاندىرىلدى

بۇل تۋرالى قالاداعى قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ ءمالىم ەتتى، دەپ حابارلايدى قازاقپارات ءتىلشىسى.

«مەملەكەتتىك قىزمەتتەردى ەلەكتروندى تۇردە جۇرگىزۋ تۇرعىسىندا جاقسى جەتىستىكتەر بار. 2022-جىلدىڭ ءبىرىنشى توقسانىنىڭ قورىتىندىسى بويىنشا 2967507 قىزمەت كورسەتىلسە، سونىڭ 361584 ءى (12,2 پايىز) قاعاز نۇسقادا، ال 2605923 ءى (87,8 پايىز) ەلەكتروندى تارتىپتە اتقارىلدى. 2021-جىلدىڭ وسى كەزەڭىمەن سالىستىرعاندا، كورسەتىلگەن قىزمەتتەردىڭ جالپى سانى 14,2 پايىزعا ءوستى. وسى ورايدا ەلەكتروندى نۇسقاداعى مەملەكەتتىك قىزمەت 11,6 پايىزعا ارتقان»، - دەدى ت. مۇراتوۆ قالا ءماسليحاتىندا وتكەن تالقىلاۋلار كەزىندە.

ونىڭ ايتۋىنشا، 2022-جىلدىڭ باسىنان بەرى باسقارما قىزمەتتەردى كورسەتۋ ساپاسىن مەملەكەتتىك قاداعالاۋ بويىنشا جۇمىستارعا كىرىستى. بۇعان دەيىن وسى قىزمەت اكىم اپپاراتىنىڭ قۇزىرىندا بولدى.

بەكىتىلگەن جوسپار بويىنشا 12 ۇيىمدى قامتۋ ەسكەرىلگەن. قازىرگى كەزدە ەكى مەديتسينا ۇيىمى تەكسەرۋدەن وتسە، تاعى بىرەۋىندە ءتيىستى ءىس-شارالار جۇرگىزىلىپ جاتىر.

«انىقتالعان كەمشىلىكتەردى تۇزەتۋ بويىنشا جۇمىستاردى جالعاستىرىپ جاتىرمىز. دەنساۋلىق ساقتاۋ سالاسىنداعى مەملەكەتتىك قىزمەت كورسەتۋ بولىگىندە وزەكتى ماسەلەلەردىڭ ءبىرى رەتىندە العاشقى كومەك كورسەتەتىن مەديتسينالىق ۇيىمعا تىركەۋ ءتارتىبىن ايتۋعا بولادى»، - دەدى ت. مۇراتوۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى