سالت اتتى ساياحاتشىلار بوزوقتان بوتايعا دەيىن ەكسپەديتسياعا شىقتى

جەتى كۇندىك ەكسپەديتسيانىڭ ماقساتى - بوزوق قالاشىعى مەن بوتاي مادەنيەتى سىندى جالپىۇلتتىق ماڭىزى بار ارحەولوگيالىق ەسكەرتكىشىن تانىمال ەتۋ، سونداي-اق قازاقستان اۋماعىندا ەكولوگيالىق تۋريزمدى ىلگەرىلەتۋ.

«وسى دالادا ادامزات العاش رەت اتتى قولعا ۇيرەتتى. بوتاي مادەنيەتى - سول ۇلى وركەنيەتتىڭ باستاۋى. بوزوق قالاشىعى - ەڭسەلى ەلوردامىزدىڭ التىن تامىرى. بۇل جەردە ۇلتتىق پارك قۇرۋ ارقىلى ءبىز كونە تاريحىمىزدى جاس ۇرپاققا ناسيحاتتايمىز. مادەنيەت جانە سپورت مينيسترلىگى اشىق اسپان استىنداعى ۇلتتىق مۋزەي قۇرىلىسىن كەزەڭ-كەزەڭمەن جۇزەگە اسىرۋدى كوزدەيدى. الداعى ۋاقىتتا دا «بوزوق» مۋزەي-قورىعىنىڭ جۇمىسى جاندانا بەرەدى. سولتۇستىك قازاقستان مەن اقمولا وبلىستارىنىڭ اراسىن اتپەن ءجۇرىپ وتەتىن ەكسپەديتسيانىڭ ءمانى ەرەكشە. وسىنداي ءىس-شارالار ارقىلى اتقا ءمىنۋدى ناسيحاتتايمىز، تاريحىمىزبەن تانىسامىز، ەكو-تۋريزمدى دامىتامىز. ەكسپەديتسيانى ۇيىمداستىرۋعا ۇلەس قوسقان بارشاڭىزعا العىس ايتامىن»، - دەدى مادەنيەت جانە سپورت ءمينيسترى داۋرەن ابايەۆ.

ايتا كەتسەك، بوزوق - قازاقستاننىڭ قازىرگى استاناسى اۋماعىندا ورنالاسقان، 1250 جىلدىق تاريحى بار كونە قالاشىق. كەزىندە بوزوق ارقىلى ۇلى جىبەك جولىنىڭ ساۋدا تارماقتارى وتكەن.

ال، بوتاي - ەرتەدەگى ەۋرازيا جىلقى وسىرۋشىلەرىنىڭ بىرەگەي قونىسى. بۇل مادەنيەتتىڭ ءومىر ءسۇرۋ ۋاقىتى ب. ع. د. V- IV عاسىرلاردا ءوتتى. وندا جۇرگىزىلگەن زەرتتەۋلەردىڭ تاريحي ماڭىزى - جىلقىلاردى قولعا ۇيرەتۋدىڭ جەر جۇزىندەگى بىردەن-ءبىر ورتالىعى قازاقستان ەكەنىن دالەلدەيدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى