جاستاردىڭ تاربيەسىنە ەرەكشە ءمان بەرۋ كەرەك - قورعانىس ءمينيسترى

ويتكەنى جاس ساربازدار ءبىر مەرزىمدە بىرگە شاقىرىلعان قاتارلاستارىمەن كەلىسپەي جاتادى، دەپ حابارلايدى قازاقپارات ءتىلشىسى.

«بۇل پروبلەمانى ەگجەي-تەگجەيلى زەردەلەۋ كەرەك. جاستار اراسىندا نە سەبەپتى وسىنداي قارىم-قاتىناس قالىپتاسقان؟ قازىرگى كەزدە سارباز تەك ءبىر جىل عانا قىزمەتتە بولادى. 12 ايدان كەيىن ۇيىنە ورالادى»، - دەدى ر. جاقسىلىقوۆ ءماجىلىستىڭ جالپى وتىرىسىنان كەيىن تىلشىلەر ساۋالىنا جاۋاپ بەرىپ.

ول كەڭەستىك كەزەڭدە جاستار ەكى-ءۇش جىل اسكەردە بولعانىن دا ەسكە سالدى.

«ال قازىر مەرزىمدى اسكەري بورىشىن وتەپ جۇرگەندەر ءبىر جىل قىزمەتتە بولادى. بۇل رەتتە 18-19 جاستاعى بالالار اراسىندا قانداي الىمجەتتىك احۋال بولۋى مۇمكىن؟ قاتارلاستارىمەن كەلىسپەي قالۋى ىقتيمال، ويتكەنى اسكەردە تەك ەر ادامدار»، - دەدى ۆەدومستۆو باسشىسى.

مينيستر جاستار اراسىنداعى كيكىلجىڭ كوشەدە دە ءجيى كەزدەسەتىنىن ايتتى.

«سوندىقتان جاستاردىڭ تاربيەسىنە ءمان بەرۋ كەرەك. بۇل جاستاردى وقىتۋ مەن تاربيەلەۋ - ءبىزدىڭ ورتاق مىندەتىمىز»، - دەدى رۋسلان جاقسىلىقوۆ.

بۇدان بۇرىن حابارلانعانداي، بۇگىن قورعانىس ءمينيسترى رۋسلان جاقسىلىقوۆ مەرزىمدى اسكەري بورىشىن وتەپ جۇرگەندەر اراسىندا ءوز-وزىنە قول جۇمساۋ جاعدايلارىنا قاتىستى پىكىر ءبىلدىردى.

جاقىندا ماڭعىستاۋ وبلىسىندا شەكارا قىزمەتىندە اسكەري بورىشىن وتەپ جۇرگەن سارباز ءوز-وزىنە قول جۇمساعان بولاتىن.

ايتا كەتەيىك، پرەزيدەنت ارميادا ءولىم-ءجىتىمنىڭ جيىلەۋىنە بايلانىستى كوميسسيا قۇرۋدى تاپسىردى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى