اباي قۇنانباي ۇلىنىڭ دوستىق تۋرالى وي ورامدارى
اباي - ءىرى گۋمانيست اقىن. سوندىقتان ول ادام ادامدى سۇيە ءبىلۋى كەرەك دەگەن يدەيانى بەرىك ۇستادى. ول جالپى ادام بالاسىنىڭ دوستىعىن جىر ەتتى. ابايدىڭ كوپ ولەڭدەرىندە ادام بالاسى بىرىنە- ءبىرى جاۋلىق ەمەس، دوستىق ىزدەسىن دەگەن پىكىر وزەك بولىپ تارتىلىپ جاتادى. «جىگىتتەر، ويىن - ارزان، كۇلكى - قىمبات» دەگەن ولەڭىندە:
كەمدى كۇن قىزىق داۋرەن تاتۋ وتكىز،
جەتپەسە بىرىڭدىكىن ءبىرىڭ جەتكىز.
كۇنشىلدىكسىز تاتۋ بوپ شىن كوڭىلمەن،
قياناتشىل بولماقتى ەستەن كەتكىز.
ابايدىڭ تۇسىنىگىنشە، ەڭ قىزىق ءومىر - تاتۋلىق، دوستىق. كۇن سايىن جاۋلىقتىڭ وتىنا ماي تامىزىپ تۇتاتۋشى قوعامنىڭ جۋان ورتاسىندا وتىرسا دا، اباي ولە- ولگەنشە دوستىقتى جىرلاۋمەن بولدى.
جۇرەگى جۇمساق بىلگەن قۇل،
شىن دوس تاپپاي تىنشىماس.
پايدا، ماقتان - ءبارى تۇل
دوسسىز اۋىز تۇشىماس، - دەدى. بۇل ولەڭ - ۇلى اقىننىڭ دوستىقتى جىر ەتكەن بارلىق ولەڭدەرىنىڭ كىلتى.
****
ادام بالاسىنا ادام بالاسىنىڭ ءبارى - دوس. نە ءۇشىن دەسەڭ: دۇنيەدە جۇرگەندە تۋىسىڭ، ءوسۋىڭ، اشىعۋىڭ، قايعىڭ، قازاڭ، دەنە ءبىتىمىڭ، شىققان جەرىڭ، بارار جەرىڭ ءبارى بىردەي.. . بىرىڭە ءبىرىڭ قوناق، قوناق سورى ەكەنسىڭ، ءوزىڭ دۇنيەگە دە قوناق ەكەنسىڭ.. .
****
جامان دوس - كولەڭكە: باسىڭدى كۇن شالسا - قاشىپ قۇتىلا المايسىڭ، باسىڭدى بۇلت السا - ىزدەپ تابا المايسىڭ.
****
دوسى جوقپەن سىرلاس،
دوسى كوپپەن - سىيلاس.
****
دوستىق - دوستىق شاقىرادى.
****
كوپ كىسى دوسىم جەتىلسە ەكەن دەمەيدى، ەگەردە ءبىرى جەتىلسە باعاناعى دوسىنا ءبىتىمى جوق دۇشپانى سول بولاتۇعىنى قالاي؟
****
كەي قۇربى بۇگىن - تاتۋ،ەرتەڭ - قاتۋ،
تىلەۋى، جاقىندىعى - ءبارى ساتۋ.
****
ءبىرىڭدى، قازاق، ءبىرىڭ دوس،
كورمەسەڭ - ءىستىڭ ءبارى بوس.
****
جاس كۇندە كىمدى كورسەڭ - ءبارى دوس.
****
جاقسى دوس - بىلگەن سىرىن سىرتقا جايماس.
****
جاۋ قوجانداپ بۇرتيىپ، دوس قۇبىلىپ اۋرە ەتەر.
****
جاۋعا - مىلتىق، دوسقا - ىنتىق.
****
دوسقا - جاز، جاۋعا - اياز.
Massaget.kz
