عالىمدار ادامنىڭ قارتايمايتىن اعزاسىن انىقتادى

درەزدەن تەحنولوگيالىق ۋنيۆەرسيتەتىنىڭ عالىمدارى باۋىر جاسۋشالارىنىڭ جاسىنا تالداۋ جۇرگىزىپ، باۋىر ادام قارتايسا دا ورتاشا جاسى ءۇش جاستان از بولادى دەگەن قورىتىندىعا كەلدى.

ماتەماتيكالىق مودەلدەۋدى جانە كومىرتەگى يزوتوپتارىنىڭ دەڭگەيىنە نەگىزدەلگەن ادام جاسۋشالارىنىڭ مەرزىمىن انىقتايتىن رەتروسپەكتيۆتى، راديوكومىرتەكتى انىقتاۋ ءادىسىن قولدانا وتىرىپ، عالىمدار باۋىرداعى جاسۋشالاردى قالپىنا كەلتىرۋ پروتسەسى قارتايۋ پروتسەسىنە تاۋەلسىز ەكەنىن انىقتادى.

عالىمدار توبى 20 مەن 84 جاس ارالىعىنداعى 50-دەن استام ادامنىڭ قايتىس بولعاننان كەيىنگى بيوپسيالىق ءتىن ۇلگىلەرىنە تالداۋ جاسادى. تالداۋ بارىسىندا باۋىردىڭ جاسۋشالارى ۇنەمى اۋىسىپ، جاڭارىپ وتىراتىنى بەلگىلى بولدى.

«20 نەمەسە 84 جاستا ەكەنىڭىز ماڭىزدى ەمەس. باۋىرىڭىز ءارقاشان جاس قالپىندا ساقتالادى. ول ءارقاشان ورتاشا ەسەپپەن ءۇش جاستا»، - دەدى درەزدەن تەحنولوگيالىق ۋنيۆەرسيتەتىنىڭ وكىلى ولاف بەرگمانن.

سونىمەن قاتار، عالىمدار باۋىردا ورتاشا جاسى 10 جاس بولاتىن جاسۋشالار توبى بولاتىنىن انىقتادى جانە بۇل حروموسومالاردىڭ جيىنتىعىمەن بايلانىستى.

«اعزامىزداعى جاسۋشالاردىڭ كوپشىلىگىندە گەنومىمىزدىڭ ەكى كوشىرمەسى بار، ءبىراق باۋىردا كەيبىر جاسۋشالار كوبىرەك كوشىرمە جاسايدى. باۋىرداعى قالىپتى جاسۋشالار جىلىنا ءبىر رەت جاڭارادى، ال كەيبىرى 10 جىلعا دەيىن ءومىر سۇرەدى»، - دەيدى عالىمدار.

ەندى زەرتتەۋشىلەر جاسۋشالاردىڭ جاسىن تالداۋ ءادىسىن قولدانىپ، ادام جۇرەگىندەگى تىندەر قانشالىقتى ءجيى جاڭاراتىنىن بىلگىسى كەلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى