اتىراۋلىق سپورتشى سامبودان ازيا چەمپيونى اتاندى
ال، ەكى سپورتشى جۇلدەگەرلەر قاتارىنان كورىندى، دەپ حابارلايدى قازاقپارات.
اتىراۋ وبلىستىق دەنە شىنىقتىرۋ جانە سپورت باسقارماسى باسپا ءسوز قىزمەتىنىڭ مالىمەتىنە سۇيەنسەك، سامبوشى ايدىنباي قايىربەردى ازيا چەمپيوناتىنىڭ جەڭىمپازى اتاندى.
«ليۆان ەلىنىڭ دجۋنيا قالاسىندا سپورتتىڭ سامبو تۇرىنەن ازيا چەمپيوناتى 2-4- ماۋسىم كۇندەرى ءوتتى. چەمپيوناتقا قۇرلىقتاعى 16 ەلدەن 260 سپورتشى قاتىسىپ، ەرەسەكتەر، جاستار جانە جاس وسپىرىمدەر اراسىنداعى ەڭ مىقتىنى انىقتاۋ ءۇشىن باق سىنادى. ەل نامىسىن ەرلەر توبىندا قورعاعان سپورتشىلاردىڭ قاتارىندا ايدىنباي قايىربەردى دە بار. ول 58 كەلى سالماقتا تارتىسقا تولى كەزدەسۋلەردى ءساتتى وتكىزىپ، قارسىلاستارىنىڭ بارىنەن باسىمدىعىن تانىتتى. ءسويتىپ، ازيا چەمپيوناتىنىڭ جەڭىمپازى اتاندى»، - دەپ حابارلادى باسقارمانىڭ باسپا ءسوز قىزمەتى.
ال، قىزدار اراسىندا ارۋجان جاندارباي كۇمىس جۇلدەنى ەنشىلەدى. ول جاس وسپىرىمدەر توبىندا 72 كەلىدە سىنعا تۇسكەن ەدى.
بۇل چەمپتوناتتا تاعى ءبىر سپورتشىنىڭ باعى جانىپ، جۇلدەگەرلەر قاتارىنان كورىندى. ول – جاس وسپىرىمدەر اراسىندا 53 كەلىدە بەلدەسكەن اڭساعان قازبەك. ەندى ونىڭ ەنشىسىندە ازيا چەمپيوناتىنىڭ قولا جۇلدەسى بار.
«ايدىنباي قايىربەردى - بۇعان دەيىن دە بىرنەشە سايىستا باق سىناپ، تاجىريبە جيناعان سپورتشى. ول 2019-جىلى ءۇندىستان ەلىنىڭ استاناسى - دەلي قالاسىندا جالاۋى جەلبىرەگەن ازيا چەمپيوناتىنا قاتىسقان. سول دودادا ءوز سالماعىنداعى قارسىلاستارىن قاپى قالدىرىپ، ازيا چەمپيونى اتانعان ەدى»، - دەپ ءمالىم ەتتى باسقارمانىڭ باسپا ءسوز قىزمەتىنەن.
