بالالى بولعان سوڭ ەستەن شىعارماۋ كەرەك دۇنيەلەر
ءبىر ۋاقىتتا جاقسى اتا-انا بولىپ تا، ءارى ءوزىڭىزدى ۇمىتىپ كەتپەي دە ءومىر سۇرە بىلسەڭىز، مىنە، عاجاپ.
بالالى بولعانعا دەيىن دە، كەيىن دە 8 ساعاتتىق ۇيقى كەرەك. ءىس جۇزىندە، اتا-انا اتانعاننان كەيىن 8 ساعاتتىق ۇيقى ءبىراز ۋاقىتقا دەيىن ۇمتىلارى انىق. ۇنەمى تونۋستا ءجۇرۋ ءۇشىن اعزاعا مەيلىنشە تىنىعۋ كەرەك ءارى فيزيكالىق جاتتىعۋدان بىرەر پورتسيا بەرىپ وتىرۋ قاجەت.
بالاڭىز ۇيىقتاعان كەزدە جۇمىسىمدى ءبىتىرىپ الايىن دەپ ەمەس، وزىمەن بىرگە كوز شىرىمىن الىپ الىڭىز.
تونۋستا ءجۇرۋ دەگەنىمىز - اعزاڭىز ەنەرگياعا تولى، دەنىڭىز ساۋ، كوڭىل-كۇيىڭىز جاقسى، ءوزىڭىز بەلسەندى بولۋ. وسىلاردى بويىڭىزدان جوعالتىپ الماساڭىز، بالاڭىز دا ساۋ، ەنەرگياسى تاسىعان ادام بوپ وسەدى.
ارنايى فيتنەس زالعا بارۋدىڭ دا قاجەتى شامالى. بالاڭىزدى ارباسىنا سالىپ الىپ، جۇگىرىپ كەلسەڭىز بولادى. ءۇي جاعدايىندا يوگامەن اينالىسساڭىز پايدالى. بالاڭىزبەن بىرگە سۋدا ءجۇزۋ ساباقتارىنا قاتىسساڭىز، كەرەمەت.
بالا ادام ءومىرىن، رەجيمىن تۇبەگەيلى وزگەرتەدى. ءسىز ەندى بار كوڭىلىڭىزدى وزىڭىزگە عانا ەمەس، بالاڭىزعا دا ءبولۋىڭىز قاجەت. دەگەنمەن، تەپە-تەڭدىكتى ساقتاعان ءجون. بۇعان دەيىن اينالىسىپ جۇرگەن حوببيىڭىز نەمەسە ەرەكشە قىزىعۋشىلىعىڭىز بولسا، اتا-انا اتانعان سوڭ ول تۋرالى ۇمىتىپ كەتپەڭىز.
ەگەر بۇرىن اينالىسقىڭىز نە ۇيرەنگىڭىز كەلگەن دۇنيەڭىز بولسا، وتباسىڭىزبەن بىرگە باستاڭىز.
اسپاپتا ويناۋ، سۋرەت سالۋ، گۇل ءوسىرۋ، اتقا ءمىنۋ، كىتاپ وقۋ، كۇندەلىك جازۋ دەگەن سەكىلدى. بالاڭىز ءسىزدى باسقا قىرىڭىزدان تانىپ وسەدى. ونىڭ تانىم كوكجيەگىن ارتتىرىپ، قىزىعۋشىلىعىن وياتاسىز. بالا اقىل-كەڭەستەن گورى، ءىس-ارەكەتپەن كورسەتكەندى تەز ءارى وڭاي قابىلدايدى.
اسىرەسە، بالا تۋۋىنا بايلانىستى ەڭبەك دەمالىسىن العان اتا-انالارعا قاتىستى. مانساپ جولىن دامىتقىسى كەلگەن اتا-انالار بۇل كەزەڭدى قالت جىبەرىپ الماۋى كەرەك. شاعىن بيزنەس باستاۋ، ج و و وقۋ، ارنايى تاقىرىپتىق سەمينار-ترەنينگتەرگە قاتىسۋ سەكىلدى قوعاممەن بايلانىسى بار شارالاردى ەستەن شىعارماعان ابزال. جەكە دامۋعا اتا-انا ستاتۋسى كەدەرگى بولا المايدى.
پسيحولوگتاردىڭ ءجيى ايتاتىنى وسى: ەگەر بالا مازاسىزدانسا، ول ءسىزدىڭ مازاڭىزدىڭ كەتكەنى، دەمەك بالا - ءسىزدىڭ ايناڭىز. ەگەر تىم قاتتى ۋشىقسا، الەۋمەتتىك جەلىدەگى مارافوندارعا ەمەس، ارنايى ماماننىڭ كومەگىنە جۇگىنىڭىز. الدىمەن ءوزىڭىزدى «ەمدەڭىز». ءسىز - بىرەۋسىز، بالالارىڭىزدىڭ دا ءبىر-اق اناسى بار. ۇشاقتاعى ەرەجە بويىنشا: الدىمەن وتتەگى ماسكاسىن ءوزىڭىز تاعاسىز، كەيىن بالاعا كيگىزەسىز.
توعىز اي قۇرساق كوتەرگەندە اتا-انا اتانۋ، بالا تاربيەسى، ونى تاماقتاندىرۋ، بالا ديەتاسى سەكىلدى كىتاپتاردى تاۋىسىپ، ۆيدەولاردى ءجيى قاراعان بولارسىز. بالا دۇنيەگە كەلگەن سوڭ دا سول زەرتتەۋىڭىزدى توقتاتپاعان ءجون. ول سالعان سۋرەت، ول ايتقان العاشقى ءسوز، العاشقى قادامى، وڭقاي نە سولاقاي بولۋى، تاماق تاڭداۋى سەكىلدى بالاڭىزعا ءتان ەرەكشەلىكتەردى زەرتتەي ءتۇسىڭىز.
بالانى بالاباقشاعا اپارۋ، الىپ كەلۋ، جۇمىسقا بارىپ-كەلۋ، كەشكى اس، ۇيقى دەگەن گرافيكتەن جالىقپادىڭىز با؟ رومانتيكا قايدا؟ اتا-انا دا وزدەرىنە كوڭىلدى كەش ۇيىمداستىرا الادى. ەگەر بالانى سەنىپ قالدىرا الاتىن اتا-اجەسى نە كۇتۋشى بولسا، قىز بەن جىگىت بوپ كونسەرتكە، تەاترعا، مەيرامحاناعا، ءتىپتى، ءبي كۋرستارىنا جازىلىپ، بىرگە بارساڭىزدار بولادى. وزدەرىڭىزگە دە، سەزىمدەرىڭىزگە دە كوڭىل بولىڭىزدەر. بۇل اسا ماڭىزدى.
زامانداستارىڭىزدىڭ دەنى شاڭىراق كوتەرىپ، اتا-انا بولىپ جاتسا، قاتارىڭىز كوبەيەدى. ولارمەن ايتىلاتىن اڭگىمە كوپ: قانداي بالاباقشا جاقسى، قاي جايالىققا بالانىڭ اللەرگياسى بار، مۋلتفيلم كورسەتكەن دۇرىس پا، بۇرىس پا؟..
ال ءالى ۇيلەنبەگەن، تۇرمىس قۇرماعان دوستارىڭىزبەن شە؟ ولارمەن دە ءجيى سويلەسىپ تۇرىڭىز. ولاردى ۇيگە شاقىرىپ، بالاڭىزبەن تانىستىرىڭىز. وتباسىلىق ءومىردىڭ شەت-جاعاسىن تانىتقانىڭىز دا دۇرىس شىعار. بۇرىنعىداي ۇستەل ۇستىندە وينايتىن ويىندارىڭىزدى ويناپ، قىزىقتارىڭىزدى ايتىپ، ەسكە العان، باسقا دا جاقسى تاقىرىپتاردا سويلەسكەن وزىڭىزگە جاقسى.
massaget.kz
