كوروناۆيرۋستىڭ جاڭا ءتۇرى مەن جاڭا تولقىنى بولۋى ىقتيمال - كۇنسۇلۋ زاكاريا
بۇل تۋرالى بيولوگيالىق قاۋىپسىزدىك پروبلەمالارى عىلىمي- زەرتتەۋ ينستيتۋتىنىڭ باس ديرەكتورى كۇنسۇلۋ زاكاريا ءمالىم ەتتى، دەپ حابارلايدى قازاقپارات ءتىلشىسى.
«قازمەديا» ورتالىعىندا ءوتىپ جاتقان «رەفەرەندۋم» ونلاين- مارافونىندا عالىمنان كوروناۆيرۋس ىندەتىنىڭ تارالۋىنا قاتىستى سۇراق قويىلدى.
«ىندەتپەن كۇرەس بويىنشا بوساڭسۋعا بولمايدى. وسى كەزەڭدە ەلىمىزدىڭ دەنساۋلىق ساقتاۋ دەڭگەيىن ايتارلىقتاي جوعارى كوتەرە الدىق. كوروناۆيرۋس ىندەتى ءبىزدىڭ بارلىق ءالسىز تۇستارىمىزدى كورسەتىپ، دەنساۋلىق ساقتاۋ مەن عىلىم جۇيەسىندەگى كەمشىلىكتەردى اشىپ بەردى. سوندىقتان بۇل ىندەتپەن كۇرەس كەزىندە عىلىمدى دامىتۋعا بايلانىستى تىڭ سەرپىن بەرىلدى»، - دەدى ك. زاكاريا.
وسى ورايدا عالىم ەلىمىزدە كوروناۆيرۋستىڭ تارالۋىنىڭ تەجەلەۋىنە ۇجىمدىق جۇمىستار زور ىقپال ەتكەنىن اتاپ ءوتتى.
«مەملەكەت باسشىسى بۇل باعىتتاعى عىلىمنىڭ دامۋىنا ەرەكشە نازار اۋدارىپ، وتاندىق ۆاكتسينانى دايارلاۋعا دەر كەزىندە تاپسىرما بەردى. اتقارىلعان اۋقىمدى جۇمىس ناتيجەسىندە ۇجىمدىق يممۋنيتەت قالىپتاستى. ۆاتسينالار اۋرۋدىڭ تارالۋىن تەجەپ تۇر. بۇل جاڭا ينفەكسيا ءالى دە تۇراقتانباعانىن، ياعني مۋتاتسياعا ۇشىراي بەرەتىنىن ءتۇسىنۋىمىز كەرەك. وسى ورايدا ونىڭ جاڭا ءتۇرى مەن ىندەتتىڭ تارالۋىنىڭ جاڭا تولقىندارى بولۋى ىقتيمال. ءبىزدىڭ ماقسات - وسى قاتەرگە دايىن بولۋ»، - دەدى كۇنسۇلۋ زاكاريا.
سونىمەن قاتار ول عىلىم سالاسىن قارجىلىندارۋ ءجۇرىپ جاتقانىن ايتتى.
«قازىر كوپتەگەن كونكۋرستار جاريالانىپ، جاس ماماندارعا ەرەكشە ءمان بەرىلىپ جاتىر. اتاپ ايتقاندا، ءبىلىم مەن عىلىم سالاسىنا ۇنەمى نازار اۋدارىپ وتىرۋ كەرەك»، - دەدى ينستيتۋت باسشىسى.
بۇدان بۇرىن حابارلانعانداي، اتالعان ونلاين- مارافون كەزىندە «الدىمەن ەكونوميكا نەمەسە ساياسات» دەگەن تاقىرىپ تالقىلانىپ، ساراپشىلار پىكىر بىلدىرگەن ەدى.
اۆتور: رۋسلان عابباسوۆ
