الماتىلىقتار ءانۇراندى قالانىڭ ءار جەرىنەن ءبىر ۋاقىتتا ورىندادى
الماتى اكىمى ەربولات دوسايەۆ قالا تۇرعىندارىمەن بىرگە مەملەكەتتىك ءانۇراندى ورىندادى. پاتريوتتىق اكتسياعا 500-دەن استام ادام قاتىستى، ونىڭ ىشىندە ءماسليحات دەپۋتاتتارى، قوعام قايراتكەرلەرى مەن جاستار بار.
سونداي-اق ءانۇران بارلىق سكۆەرلەردە، جاياۋ جۇرگىنشىلەر كوشەلەرىندە، مەترودا، «مەدەۋ» كەشەنى مەن «شىمبۇلاق» كۋرورتىنىڭ اۋماعىندا، «كوكتوبە» ساياباعىندا شىرقالدى.
اكسيانىڭ ماقساتى - ازاماتتىق پەن پاتريوتتىققا، ءوز وتانى - قازاقستان رەسپۋبليكاسىنا دەگەن سۇيىسپەنشىلىككە تاربيەلەۋ، ەلدىڭ مەملەكەتتىك رامىزدەرىنە دەگەن قۇرمەتتى قالىپتاستىرۋ، سونداي- اق ولاردىڭ ءمانى مەن ماڭىزىن ءتۇسىنۋ.
اتا كەتەيىك، بيىل مەملەكەتتىگىمىزدىڭ سيمۆولدارىنىڭ قابىلدانعانىنا 30 جىل تولىپ وتىر.
ەسكە سالساق، مەملەكەتتىك ءانۇراندى كوپشىلىك الدىندا ورىنداۋ كەزىندە جينالعاندار تۇرىپ قوسىلىپ ايتادى، ال قازاقستان رەسپۋبليكاسىنىڭ ازاماتتارى وڭ قولىن جۇرەك تۇسىنا قويادى. مەملەكەتتىك ءانۇران ءماتىنى مەن مۋزىكالىق باسىلىمعا سايكەس مەملەكەتتىك تىلدە ورىندالادى.
اۆتور: الما مۇقانوۆا
