الماتىلىق بويجەتكەن ەرەكشە ۆيدەولارىمەن جۇرتتى تاڭقالدىردى
ول قازاقپارات تىلشىسىنە ءوزىنىڭ وسى حوببيى تۋرالى ايتىپ بەردى.
«مەن الماتى قالاسىندا تۇرامىن. سۋرەتشى ءارى تريەۆەل- بلوگەرمىن. جاسىم قۇپيا بولىپ قالسىن. بۇل ۆيدەوعا جىگىتىممەن بىرگە ءتۇستىم»، - دەدى انگەلا نيكولاۋ.
ول Esentai Tower بيزنەس- ورتالىعىنىڭ توبەسىندە تۇسىرىلگەن ۆيدەونى ايتىپ وتىر. بەينەجازبانىڭ ءساتتى تۇسىرىلگەنىن دە اتاپ ءوتتى.
«جىگىتىم ەكەۋمىز تاڭەرتەڭ ەرتە كۇننىڭ شىققانىن ءتۇسىرۋ ءۇشىن Esentai Tower- دىڭ توبەسىنە كوتەرىلدىك. ۆيدەومىز ءساتتى ءتۇسىرىلدى جانە بۇل ۆيدەو جەلىدە ءالى دە تانىمال. جالپى، بۇعان دەيىن «نۇرلى تاۋ» ورتالىعىنىڭ توبەسىندە تۇسىرىلگەن ۆيدەومىز دا كوپ پابليكتەرگە شىققان ەدى»، - دەدى تريەۆەل-بلوگەر.
ايتۋىنشا، بيىك عيماراتتاردىڭ توبەسىنە شىعىپ، ۆيدەو ءتۇسىرۋ - ونىڭ حوببيى. سۇيىكتى ىسىمەن كوپ جىلدان بەرى اينالىسادى جانە بيىكتىكتەن مۇلدەم قورىقپايدى.
«مەن الەمدى ارالاپ، ساياحاتتاپ جۇرەمىن. سول كەزدە جەر بەتىندەگى ەڭ بيىك ءارى ايگىلى عيماراتتاردىڭ توبەسىنە شىعىپ، ۆيدەو تۇسىرەم. بۇل - مەنىڭ حوببيىم. ونىمەن اينالىسىپ جۇرگەنىمە 7 جىلدان استى. مەن ودان قورىقپايمىن. ايتا كەتەيىن، بيىككە شىققانىمدا ەشقانداي قوسالقى ساقتاندىرعىش قۇرال-سايمانداردى قولدانبايمىن»، - دەدى ول.
