قازاقستاندا ستۋدەنتتەرگە اتا-اناسىنىڭ رۇقساتىنسىز نەسيە بەرمەۋ ۇسىنىلدى
«ءبىز قازىر ستۋدەنتتەرمەن تىعىز قارىم-قاتىناس ورناتۋعا تىرىسامىز. بۇرىن جاستار ىشپەسە، شەكپەسە دەپ قورقاتىن ەدىك. قازىر باسقا پروبلەما. بۇگىندە بارلىق ستۋدەنتتە دەرلىك نەسيە بار. ول تۋرالى اتا-انالارى بىلمەيدى. اتا-اناسى ءبىلىپ قويعاننان كەيىن ەكىجاقتى پروبلەما باستالادى. سوسىن ول ستۋدەنت نەسيەمدى جابامىن دەپ، تاعى نەسيە الىپ نەمەسە قارىز الىپ جاتادى. قارىزدان قۇتىلۋ ءۇشىن بۋكمەكەرلىك مەكەمەلەرگە ءباس تىگىپ نەمەسە لومباردقا جەكە زاتتارىن وتكىزىپ جاتادى. وزىمەن قويماي، دوستارىنىڭ سەنىمىنە كىرىپ، ولارعا دا نەسيە الدىرعان جايتتار بار. ءبىز بۇل ماسەلەنى ءمينيستردىڭ الدىندا قوزعادىق. وسى ورايدا ستۋدەنت دەگەن مارتەبەسى بار جاستارعا اتا-اناسىنىڭ رۇقساتىنسىز نەسيە بەرمەۋ تۋرالى زاڭ قابىلداپ نەمەسە شەشىم شىعارۋدىڭ مۇمكىندىگى بار ما؟» - دەدى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندەگى جاستار دەپارتامەنتىنىڭ ديرەكتورى جامبىل تىلەپوۆ.
اتالعان ساۋالعا قاتىستى ق ر پارلامەنتى سەناتىنىڭ دەپۋتاتى نۇرلان بەكنازاروۆ پىكىر ءبىلدىردى.
«بىلتىر ەلىمىزدە نەسيە بەرۋ بويىنشا بانكتەردىڭ تالابى قاتاڭداتىلدى. بۇل باعىتتا جۇمىس ءجۇرىپ جاتىر. بۇل ماسەلەنىڭ ەكىنشى جاعى بار. ەگەر نەسيە بەرۋدى مۇلدەم قاتاڭداتىپ تاستاساق، ورتا جانە شاعىن بيزنەس وكىلدەرى زارداپ شەگۋى مۇمكىن. وزدەرىڭىز بىلەتىندەي، شاعىن جانە ورتا كاسىپكەرلىك - ەل ەكونوميكاسىنىڭ درايۆەرى. سەبەبى جەكە كاسىپكەر رەتىندە تىركەلىپ نەمەسە ج ش س (جاۋاپكەرشىلىگى شەكتەۋلى سەرىكتەستىك) اشىپ تىرشىلىك ەتىپ جۇرگەن جاستار قانشاما. ياعني تاياقتىڭ ەكى ۇشى بارىن ۇمىتپاعان ءجون. جالپى ماسەلەدەن ءبىزدىڭ دە حابارىمىز بار. تالاپتى قاتاڭداتۋ كەرەك»، - دەيدى ول.
ايتا كەتسەك، بۇگىن ەلورداداعى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە «كونستيتۋتسيالىق رەفورمالاردىڭ جاڭا قازاقستان ءۇشىن ماڭىزدىلىعى» اتتى جيىن ءوتتى.
اتالعان شارادعا سەنات دەپۋتاتى جاستارعا 5- ماۋسىمدا وتەتىن رەفەرەندۋمنىڭ ءمانى مەن ماڭىزىن ءتۇسىندىرىپ بەردى.
