وسكەمەندە قاتتى جەلدەن كران قۇلاپ كەتتى
ق ر توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتىنىڭ مالىمەتىنە سۇيەنسەك، وقىس وقيعا 1-ماۋسىمدا ساتبايەۆ داڭعىلىنداعى قۇرىلىسى جۇرگىزىلىپ جاتقان كوپقاباتتى ءۇيدىڭ ماڭىندا بولعان.
«قاتتى جەلدىڭ سالدارىنان قۇرىلىس الاڭىنداعى مۇنارالى كران قۇلاپ كەتتى. زارداپ شەككەن ەشكىم جوق. كران باسقا عيماراتتار مەن قۇرىلىس نىساندارىنا ەش زاقىم كەلتىرمەدى»، - دەلىنگەن اقپاراتتا.
سول ساتتە كران جۇمىسقا قولدانىلماي، بوس تۇرعان. ەندى كوميتەتتىڭ شىعىس قازاقستان وبلىسى بويىنشا دەپارتامەنتىنىڭ ماماندارى وقيعانىڭ ءمان-جايىن انىقتايدى.
ەسكە سالساق، ەلوردادا كوپقاباتتى ۇيگە كراننىڭ قۇلاۋى بويىنشا تەكسەرۋ اياقتالدى.
اۆتور: تالعاتجان مۇحامەتبەك ۇلى
