ەلوردادا ماۋسىم ايىندا قانداي مادەني ءىس- شارالار وتەدى
بۇل تۋرالى ۇيىمنىڭ باسپا ءسوز قىزمەتى حابارلادى. كونسەرتتەردە قازاقستاندىق جانە شەتەلدىك ارتىستەر ونەر كورسەتەدى.
3-ماۋسىم كۇنى ساعات 19:30 دا قازاقكونتسەرتتىڭ ۇلكەن ساحناسىندا «ۆەچەر مۋزىكالنىح كونتراستوۆ» كونسەرتى وتەدى. كونسەرتكە بەلگىلى پيانيست نيكولاس بۋردونكل (فرانتسيا) جانە ديريجەر، دنەپروپەتروۆسك فيلارمونياسى وركەسترىنىڭ جەتەكشىسى ايدار تورىبايەۆ (ۋكراينا)، الەمگە تانىمال سكريپكاشى، قازاقستاننىڭ حالىق ءارتىسى ايمان مۇساقوجايەۆا قاتىسادى. ارتىستەر قازاق مەملەكەتتىك سيمفونيالىق وركەسترىمەن بىرگە كلاسسيكالىق مۋزىكانىڭ تانىمال تۋىندىلارىن ورىندايدى.
5-ماۋسىم كۇنى ساعات 17:00 دە «كوك اسپانىم - كوك تۋىم» اتتى ۇلكەن گالا- كونسەرت وتەدى. كونتسەرتتىڭ باستى ەرەكشەلىگى - مۋزىكالىق جانرلاردىڭ سان الۋاندىعى.
بۇل كەشتە كلاسسيكالىق مۋزىكا، ەسترادالىق جانە بەلگىلى ءداستۇرلى اندەردى تىڭداپ، ميۋزيكل تەاترىنىڭ ونەرىن تاماشالاي الاسىزدار. كونسەرتكە روزا رىمبايەۆا، ەرلان رىسقالي، ازامات جىلتىركوزوۆ، مەدەت شوتابايەۆ، ارداق بالاجانوۆا، ايزادا كاپونوۆا، گۇلسىم مىرزابەكوۆا، كۇنسۇلۋ تۇرىكپەن، اسقار مۇقيات، امىرە، الىبەك الماديەۆ، رۋحيا بايدۇكەنوۆا، ازات مالىك، سالتانات مەڭدىعاليەۆا، ءبىرجان ايتاحمەتوۆ، ديدار ءابدىحالىق، ايگەرىم التىنبەك، TY ءدۋەتى ونەر كورسەتەدى.
قازاق مەملەكەتتىك سيمفونيالىق وركەسترى، «استانا سازى» قازاق فولكلورلىق ءانسامبلى، «FORTE TRIO» مەملەكەتتىك تريوسى، «استانا ميۋزيكل» مەملەكەتتىك تەاترى مەن «SazSoul» توبى ونەرلەرىن ورتاعا سالادى.
سول سياقتى ءداستۇرلى انشىلەر 6-ماۋسىم كۇنى ساعات 19:00 دە وتەتىن «وتان انا» كونسەرتىندە ونەر كورسەتەدى. كونتسەرتكە قازاقستاننىڭ ەڭبەك سىڭىرگەن قايراتكەرى ەرلان رىسقالي باستاعان «حالىق قازىناسى» ونەر ءبولىمىنىڭ ارتىستەرى ونەر كورسەتەدى. سول سياقتى كومپوزيتور باۋىرجان اقتايەۆتىڭ كوركەمدىك جەتەكشىلىگىمەن «استانا سازى» فولكلورلىق ءانسامبلى ءوز ونەرلەرىن ورتاعا سالادى. بۇل كەشتە سىزدەر ۇلتىمىزدىڭ اۋەلەگەن اسەم ءان، كۇمبىرلەگەن كۇي مەن جىر جاۋھارلارىنان سۋسىندايتىن بولاسىزدار.
8-ماۋسىم كۇنى ساعات 19:00 دە تالانتتى جاس انشىلەر ونەر كورسەتەدى. «جاستار ءانى» كونسەرتىندە جاڭا اۆتورلىق اندەر، بەلگىلى حالىق شىعارمالارى مەن زاماناۋي ولەڭدەر ورىندالادى. ساحنادا گۇلسىم مىرزابەكوۆا، ەربولات ناريمان ۇلى، ەربول تاجىبايەۆ، سالتانات مەڭدىعاليەۆا، رۋحيا بايدۇكەنوۆا، گۇلنار كوشەنوۆا، ديدار ءابدۋحالىق، «Sazsoul» توبى مەن «مەلومەن» توبى ونەر كورسەتەدى.
قازاقكونتسەرت قۇرامىنداعى «Astana musical» مەملەكەتتىك تەاترى دا كورەرمەندەردى ەرەكشە تۋىندىلارىمەن قۋانتادى.
10-ماۋسىم كۇنى قازاقكونتسەرتتىڭ ۇلكەن ساحناسىندا اتاقتى ءانشى روزا باعلانوۆانىڭ 100 جىلدىعىنا ارنالعان «روزا باعلانوۆا» ميۋزيكلى ساحنالانادى.
16-ماۋسىم كۇنى ساعات 19:30-دا «شاڭىراق» مۋزىكالىق پەرفورمانسى وتەدى. بارلىق كورىنىستەر بىرلىكتىڭ سيمۆولى - كيىز ءۇيدىڭ ىشىندە ساحنالانادى.
30-ماۋسىمدا «Astana musical» تەاترىنىڭ «دوستار سەرتى» ميۋزيكلى قويىلادى. قويىلىمعا قازاق مۋزىكاسىنىڭ «التىن قورىنا» ەنگەن ش. قالداياقوۆ، ە. حاسانعاليەۆ جانە «دوس- مۇقاسان» توبىنىڭ اندەرى ارقاۋ بولماق. سونىمەن قاتار الەمدىك مۋزىكانىڭ شەديەۆرلەرى مەن «بيتلز» توبىنىڭ رەپەرتۋارىنداعى تۋىندىلار ورىندالاتىن بولادى.
