ۆەلوسيپەدپەن الەمدى ارالاپ جۇرگەن ەرلى- زايىپتى فرانسۋزدار اقتاۋعا كەلدى
بۇل تۋرالى اقتاۋ قالاسى اكىمىنىڭ باسپا ءسوز قىزمەتىنە سىلتەمە جاساپ قازاقپارات حابارلايدى.
ساياحاتشى جۇپ 2022 -جىلى 29- ساۋىردە گرۋزيادان ازەربايجانعا، ال 7- مامىردا باكۋگە جەتىپ، 25- مامىردا اقتاۋعا كەلگەن. اقتاۋدا فرانسۋز ساياحاتشىلارى نازاربايەۆ زياتكەرلىك مەكتەبىنىڭ وقۋشىلارى مەن ش. ەسەنوۆ اتىنداعى ۋنيۆەرسيتەتىنە ءوز جوبالارىن ۇسىندى. ءوز تانىستىرىلىمىندا ەميلي مەن دەۆيد داۋن سيندرومىن عانا ەمەس، ەستۋ جانە تىرەك- قيمىل اپپاراتىنىڭ بۇزىلۋى ماسەلەلەرىن دە قوزعاپ ءوتتى.
بۇگىندە دەۆي مەن ەميلي سانچيس - داۋن سيندرومى بار بالالارعا قولداۋ كورسەتۋ ماقساتىنداعى Bike Up&Dow ۆەلوشەرۋ جوباسىنىڭ جەتەكشىلەرى. جوبا فرانتسيانىڭ Trisomie 21 France فەدەراتسياسىنىڭ جانە ونىڭ حالىقارالىق سەرىكتەسى Down Syndrome International قولداۋىمەن باستالعان.
- ۆەلوسيپەدپەن ساياحاتتاۋ بارىسىندا ادامدارمەن سويلەسۋگە، ولارمەن تانىسۋعا كوبىرەك مۇمكىندىك بار. ءبىزدى جولدا توقتاتىپ قوناققا شاقىرعاندار دا بولدى. ءار ەلدىڭ ادامدارىن جاقسى ءتۇسىنىپ، جاقىن بولعىمىز كەلەدى، - دەيدى ەميلي.
وتباسىلىق جۇپ ۆەلوشەرۋدىڭ ارقاسىندا داۋن سيندرومى جانە باسقا دا پسيحيكالىق اۋىتقۋى بار ادامداردىڭ سپورتپەن شۇعىلدانۋىنا ىقپال ەتكىسى كەلەدى.
- ءبىز بارعان فرانسيا، گەرمانيا، اۆستريا، سلوۆاكيا، ۆەنگريا، رۋمىنيا، مولدوۆا، ۋكراينا، تۇركيا، گرۋزيا، ازەربايجان ەلدەرىندە ساياحاتشىلار زياتكەرلىك مۇمكىندىگى شەكتەۋلى ادامدارعا ارنالعان سپورتتىق ءىس- شارالارعا قاتىستى قاۋىمداستىقتارمەن پيكنيك ۇيىمداستىرىپ، داۋن سيندرومى نەمەسە كەز كەلگەن باسقا اقىل- وي كەمىستىگى بار ادامدار تۇراتىن ارنايى مەكەمەلەر مەن ۇيلەردە بولدىق. سونىمەن قاتار، مەيرامحانالار مەن قوناق ۇيلەردە، الەۋمەتتىك فەرمالار مەن مەكتەپتەردە جوبامىزدى ۇسىندىق، - دەيدى ساياحاتشى جۇپتار.
قازاقستاننان كەيىن ەميلي مەن دەۆي وزبەكستانعا جانە ورتالىق ازيانىڭ باسقا ەلدەرىنە بارۋدى جوسپارلاپ وتىر.
اۆتور: جانات قاپالبايەۆا
