پرەزيدەنتكە «الپامىس باتىر» جىرىن وقىپ بەرگەن الماتىلىق وقۋشى ساۋلەتشى بولعىسى كەلەدى
ميحايل ءبىرىنشى سىنىپتان باستاپ قازاق سىنىبىندا وقيدى.
«مەن مەكتەپكە ەمتيحانعا دايىندالۋعا كەلگەنمىن. سول كەزدە مەكتەپ ديرەكتورىنىڭ تاربيە ءىسى جونىندەگى ورىنباسارى مەن مۇعالىمدەر «ميشا جارايسىڭ، سەن «كىتاپتار قازىناسى» بايقاۋىنان ءوتتىڭ. ەندى مەملەكەت باسشىسىنىڭ الدىندا ءسوز سويلەيسىڭ» دەدى. العاشىندا تۇسىنبەدىم، ءازىل شىعار دەپ ويلادىم، ءبىراق كەيىن بارلىق ۇستازدار مەنىمەن ولاي قالجىڭدامايتىنىن ءتۇسىندىم. سودان كەيىن دايىندالا باستادىم. جەتىنشى سىنىپتا «الپامىس باتىر» جىرىن جاتتاعام، ءبىراز ۇمىتىپ قالىپپىن. سوندىقتان قايتالاپ، دايىندالدىم»، - دەيدى ميحايل شۋت.
ونىڭ كوركەم ادەبيەتكە دەگەن قىزىعۋشىلىعى جەتىنشى سىنىپتا ويانعان. قازىر مەكتەپ ءبىتىرىپ جاتىر. بولاشاقتا تانىمال ساۋلەتشى بولىپ، قازاقستاننىڭ اتىن الەمگە پاش ەتۋدى ارماندايدى.
«قازاق ادەبيەتى ساباعى مەنىڭ ەڭ جاقسى كورەتىن پاندەرىمنىڭ ءبىرى. ماعان شاكارىم قۇدايبەردى ۇلى مەن ابايدىڭ شىعارماشىلىعى ۇنايدى. ءبىراق، جانىما جاقىنى - ساۋلەت ونەرى. انام مەنىڭ سۋرەت سالۋعا جانە سىزۋعا قابىلەتتى ەكەنىمدى ايتتى. راسىندا سولاي. مەن جۋرناليستيكاعا بارامىن دەپ ويلادىم، ءبىراق ءبىرىنشى ۇلتتىق ءبىرىڭعاي تەستىنى تاپسىرعاننان كەيىن ونىڭ قيىن ەكەنىن ءتۇسىندىم. قاجەتتى 35 ۇپايدىڭ تەك 26 سىن عانا جيناي الدىم. قازىر الداعى ۇ ب ت- عا قىزۋ دايىندالىپ جاتىرمىن»، - دەيدى الماتىلىق وقۋشى.
ميحايل شۋت دوستارىنىڭ باسىم بولىگى قازاق ەكەنىن اتاپ ءوتتى.
«مەن قازاقى ورتادا ءوستىم. بالاباقشاعا دا قازاق توبىنا باردىم. قازاق ءتىلى - كۇردەلى ءتىل. ءبىراق، مەن ۇيرەندىم. قازاق ءتىلىن ۇيرەنگىسى كەلەتىندەرگە كوبىرەك سول تىلدە سويلەۋگە كەڭەس بەرەمىن. بۇل كوپ كومەكتەسەدى»، - دەيدى ول.
اناسى ەلەنا شۋتوۆا — 187№ مەكتەپتە باستاۋىش سىنىپ مۇعالىمى. ونىڭ ايتۋىنشا، ميحايل سالماقتى، سابىرلى، فۋتبولدى جاقسى كورەدى.
«بالام 4-سىنىپتان باستاپ قالالىق، رەسپۋبليكالىق بايقاۋلارعا، ءمۇشايرالارعا قاتىسىپ كەلەدى. 7-سىنىپتا قازاق تىلىندە پوەما جاتتاپ، ادەبي بايقاۋدان ديپلوم الدى. ولەڭدى تەز جاتتاپ الادى. ونىڭ بۇگىن مەملەكەت باسشىسىنىڭ الدىندا قالاي ولەڭ وقىعانىن كوردىم. مەن ۇلىمدى جاقسى كورەمىن جانە ونى ماقتان تۇتامىن»، - دەيدى ەلەنا شۋتوۆا.
ايتا كەتەيىك، بۇگىن «الماتى بالاfest» قالالىق بالالار فەستيۆالىندە 187№ مەكتەپتىڭ 11-سىنىپ وقۋشىسى ميحايل شۋت «الپامىس باتىر» جىرىنان ءۇزىندى وقىدى.
