باس پروكۋراتۋرا وكىلى قاڭتاردا الماتىدا جاسالعان قىلمىستاردىڭ ءمان- جايلارىن ايتتى

«بۇعان دەيىن حابارلانعانداي، مەملەكەتتىك نىسانداردى قيراتۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارى، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعان. بۇگىن الماتى قالاسىندا جاسالعان قىلمىستاردىڭ ءمان- جايلارىنا تولىق توقتالعىم كەلەدى. زورلىق- زومبىلىقتىڭ، قيراتۋلاردىڭ، بيلىك وكىلدەرىنە قارسى كۇش قولدانۋدىڭ ەڭ اۋىر فاكتىلەرى وسى قالادا تىركەلگەن. 4-قاڭتاردا شامامەن ساعات 6 مەن 8 ارالىعىندا ازاماتتار ەكى جەرگە جينالعانى انىقتالدى: «الماتى ارەنا» سپورت كەشەنى جانىندا - باتىس بولىگىندە؛ «حالىق ارەنا» سپورت كەشەنىنىڭ جانىندا - شىعىس بولىگىندە. بۇل نۇكتەلەر لوگيستيكا تۇرعىسىنان الماتىنىڭ شالعاي اۋداندارىنان ازاماتتاردىڭ كەلۋىنە جانە الماتى وبلىسىنان قالاعا كىرۋ ءۇشىن ىڭعايلى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

ونىڭ ايتۋىنشا، كەشكى ساعات 9 دا ەكى ۇيىمداسقان توپ ادامدار ءبىر ۋاقىتتا قالا اكىمدىگىنە قاراي جۇرە باستادى. اباي، تولە بي سياقتى ۇلكەن كوشەلەرمەن ءجۇرىپ، ولار كوپتەگەن ادامداردى جينادى جانە ارماتۋرا، تاياقتار، تاستارمەن قارۋلاندى. «ۆاتساپ» جانە «تەلەگرامم» مەسسەندجەرلەرى ارقىلى توپتاردىڭ جينالۋى مەن قوزعالىسىن ۇيلەستىردى.

«ساناۋلى ساعات ىشىندە ءبىر مەسسەندجەرگە قاتىسۋشىلاردىڭ سانى 140 تان 5500 گە دەيىن ءوستى. ناتيجەسىندە ءتۇن ورتاسىندا اكىمدىك الدىنداعى ورتالىق الاڭعا قالانىڭ كورسەتىلگەن جەرلەرىنەن 10 مىڭعا جۋىق ادام كەلدى. وسى ۋاقىتتا «اشۋلى» توپ الاڭدا ورنالاسقان عيماراتتاردى، مۇلىكتەردى، ونىڭ ىشىندە تۇراققا قويىلعان اۆتوكولىكتەردى قيراتىپ، ورتەۋدى باستادى. تارتىپسىزدىكتەرگە قاتىسۋشىلار پوليسيا قىزمەتكەرلەرىنە، اسكەريلەرگە شابۋىل جاسادى. جولدىڭ ءجۇرۋ بولىگىن جاۋىپ تاستادى، كولىكتەردى ورتەپ، ازاماتتاردى تارتىپسىزدىكتەرگە قاتىسۋعا شاقىردى جانە تونادى»، - دەدى باس پروكۋراتۋرا وكىلى.

ەلدوس قيلىمجانوۆتىڭ اتاپ وتۋىنشە، قىلمىسكەرلەر ماقساتتى تۇردە قارۋ دۇكەندەرىن توناپ، ۇرلانعان قارۋلارمەن بەينە كامەرالاردى جويعان. بارلىعى الماتى قالاسى بويىنشا 587 بەينە كامەرا جويىلعان. ونىڭ 283 ءى ورتالىق جەدەل باسقارماسىنا تيەسىلى، 304 ءى «سەرگەك» كەشەنىنىڭ كامەرالارى. مۇنىمەن قوسا، وپتيكالىق بايلانىس جەلىلەرى بار كوممۋتاتسيالىق شكافتار ىستەن شىعارىلعان.

«سانى 1 مىڭ ادامعا دەيىنگى جەكەلەگەن توپتار حالىق اراسىندا ۇرەي تۋدىرۋ ءۇشىن مەملەكەتتىك بيلىكتىڭ سيمۆولى جانە قالا تىرشىلىگىنىڭ جەدەل باسقارۋ ورتالىعى رەتىندە اكىمدىك پەن پرەزيدەنت رەزيدەنتسياسىن ماقساتتى تۇردە باسىپ الدى. قوعامدىق قاۋىپسىزدىكتى جانە ءتارتىپتى قامتاماسىز ەتۋگە كەدەرگى كەلتىرۋ ءۇشىن قىلمىسكەرلەرمەن پوليتسيا ورگاندارىنىڭ عيماراتتارىنا شابۋىلدار جاسالدى. شابۋىل جاساۋدىڭ تاعى ءبىر ماقساتى ول قارۋ- جاراق، وق- دارىلەر مەن قورعانىس قۇرالدارىن يەمدەنۋ بولدى. شابۋىلدىڭ ماڭىزدى ستراتەگيالىق وبەكتىلەرىنىڭ ءبىرى الماتى قالاسىنىڭ اۋەجايى بولدى. وندا قىلمىسكەرلەر ۇشۋ- قونۋ جولاعىنىڭ جارىعىن ءوشىردى، سودان كەيىن عيماراتتى قيراتتى جانە توناۋلار جاسادى»، - دەدى ول.

اۆتور مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى