الماتىداعى پرەزيدەنت رەزيدەنتسياسىن باسىپ الۋ بيلىكتى قۇلاتۋ كەزەڭدەرىنىڭ ءبىرى رەتىندە ويلاستىرىلعان

بۇل تۋرالى ق ر باس پروكۋراتۋراسى 1-قىزمەت باستىعىنىڭ ورىنباسارى ەلدوس قيلىمجانوۆ ايتتى، دەپ حابارلايدى قازاقپارات ءتىلشىسى.

«5-قاڭتاردا كۇندىز الماتى قالاسىندا قىلمىسكەرلەر اۋەزوۆ اۋداندىق پوليسيا باسقارماسى جانە المالى اۋداندىق پوليسيا باسقارماسى مەن بولىمشەسىنىڭ اكىمشىلىك عيماراتتارىن باسىپ الۋعا تىرىستى. سول كۇنى كەشكە قارۋلى توپ قالالىق پوليسيا دەپارتامەنتىنىڭ عيماراتىنا شابۋىل جاسادى. ولار ءارتۇرلى باعىتتاردان جۇيەلى تۇردە شابۋىل جاسادى. اتىس قارۋى مەن جارىلعىش زاتتاردى قولداندى. پوليسيا عيماراتىن قورشاۋ ءبىر تاۋلىكتەن استام ۋاقىتقا سوزىلدى. قالا اكىمدىگىنىڭ عيماراتىن باسىپ العاننان كەيىن قىلمىسكەرلەر پرەزيدەنت رەزيدەنسياسىنىڭ عيماراتىنا كوشتى. شابۋىلداۋدىڭ بەلسەندى كەزەڭى ساعات 15.00 دەن 16.00گە دەيىن بولدى. شابۋىلداۋشىلار باسىپ الىنعان ارنايى تەحنيكانى پايدالانىپ، عيماراتتىڭ قاقپاسى مەن قورشاۋىن كەمىندە 5 رەت بۇزۋعا تىرىستى. شابۋىلداۋ كەزىندە قارۋ دۇكەندەرىنەن ۇرلانعان قارۋلار قولدانىلدى. ءتىرى قالقان رەتىندە اكىمدىككە شابۋىل جاساۋ كەزىندە تۇتقىنعا الىنعان اسكەري قىزمەتكەرلەر پايدالانىلدى. قىلمىسكەرلەردىڭ باسىم كوپشىلىگى الكوگولدىك جانە ەسىرتكىلىك ماس كۇيىندە بولدى»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.

باس پروكۋراتۋرا وكىلىنىڭ اتاپ وتۋىنشە، سول كۇنى قاراڭعى جانە قالىڭ تۇماننىڭ تۇسۋىنە بايلانىستى عيماراتتى قورعاۋ مۇمكىن بولمادى. ويتكەنى بەيبىت تۇرعىنداردىڭ قۇربان بولۋ قاۋپى جوعارى ەدى.

«ساعات 19.25 تە رەزيدەنسيانىڭ قورشاۋى كامازبەن الىندى جانە قارۋلى توپ ىشكە كىردى. رەزيدەنتسيانى باسىپ الۋ بيلىكتى قۇلاتۋ كەزەڭدەرىنىڭ ءبىرى رەتىندە ويلاستىرىلعان. سەبەبى مۇنداي عيمارات پەن اكىمدىكتى باسىپ الۋ قالانىڭ مەملەكەتتىك باسقارۋ جۇيەسىندە حاوس تۋدىرۋى جانە حالىقتىڭ ءوز قاۋىپسىزدىگى ءۇشىن دابىل قاعۋى كەرەك بولاتىن. اكىمدىك پەن پرەزيدەنت رەزيدەنتسياسىنا شابۋىلدار كەزىندە قاۋىپسىزدىك كۇشتەرىنىڭ ەسكەرتۋىنە قاراماستان، قىلمىسكەرلەر قاۋىپ قاتەردى، ولارعا قاتىستى اتىس قارۋىن قولدانۋدى ۇعىنا وتىرىپ، عيماراتتارعا ماقساتتى تۇردە شابۋىل جاسادى. بۇگىنگى كۇنى رەزيدەنتسيا عيماراتىنا جاسالعان شابۋىلدارعا تويتارىس بەرۋ كەزىندە قازا تاپقان 12 ادام تەرروريزم اكتىلەرىن جاساعانى ءۇشىن كۇدىكتى دەپ تانىلدى. عيماراتتاردى قيراتۋلار، ورتەۋ جانە قارۋلى شابۋىلدار ناتيجەسىندە الماتى قالاسى بويىنشا الدىن الا شىعىن 98 ميلليارد تەڭگەنى قۇرادى. ونىڭ ىشىندە 1592 بيزنەس سۋبەكتىلەرىنە 92 ميلليارد تەڭگە زالال كەلتىرىلدى. قۇرىلىمدىق كۇشتەردىڭ 9 قىزمەتكەرى قازا بولىپ، 2260 ى دەنە جاراقاتتارىن الدى. قىلمىسكەرلەردىڭ كورسەتىلگەن ارەكەتتەرى زاڭ بويىنشا تەرروريزم اكىسى رەتىندە سارالانادى»، - دەدى ەلدوس قيلىمجانوۆ.

اۆتور مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى