عىلىممەن اينالىساتىن اكادەميكتەرگە ءومىر بويى اي سايىن ستيپەنديا بەرۋ ماسەلەسى شەشىلەدى - توقايەۆ
بۇل تۋرالى مەملەكەت باسشىسى قاسىم- جومارت توقايەۆ ۇلتتىق عىلىم اكادەمياسىنىڭ 75 جىلدىعىنا ارنالعان سالتاناتتى سەسسيادا ايتتى، دەپ حابارلايدى قازاقپارات. پرەزيدەنتىڭ سوزىنشە، شىن مانىندە اكادەميانىڭ الەۋەتى جانە مۇمكىندىگى الدەقايدا زور.
«بۇگىنگى احۋالىنا قاراپ، اكادەميانىڭ بولاشاعى بۇلىڭعىر دەپ سانايتىندار، وكىنىشكە قاراي، از ەمەس. ءتىپتى، اكادەميكتەردىڭ وزدەرى دە وعان كۇمانمەن قارايدى. الەمدىك تاجىريبەگە كوز سالساق، مۇنداي قۇرىلىمدار ەكى ءتۇرلى ۇلگىدە بولادى. ولارعا مەملەكەتتىك مارتەبە بەرىلەدى نەمەسە تاۋەلسىز كوممەرتسيالىق ەمەس ۇيىم رەتىندە جۇمىس جۇرگىزەدى. ءبىز ءتۇرلى جاعدايعا بايلانىستى ءبىر كەزدە وزگەشە جولدى تاڭداۋعا ءماجبۇر بولدىق. ۇلتتىق عىلىم اكادەمياسى كوپتەگەن قوعامدىق ۇيىمنىڭ قاتارىنا قوسىلىپ كەتتى. سالدارى قانداي بولعانىن قازىر كورىپ وتىرمىز. دەگەنمەن، ونىڭ كادرلىق جانە ينستيتۋتتىق الەۋەتى ءالى دە جوعارى»، - دەد پرەزيدەنت.
سونداي- اق ول اكادەميكتەر بارىنشا اشىق ءارى ءادىل سايلانۋى قاجەت ەكەنىنە توقتالدى.
«جۇرت ۇيىمعا مۇشە بولۋ راسىمدەرىن جانە وعان ۇمىتكەرلەردى تولىعىمەن ءبىلىپ وتىرۋعا ءتيىس. عىلىمي قىزمەتپەن تىكەلەي اينالىساتىن اكادەميكتەرگە ءومىر بويى اي سايىن ستيپەنديا بەرۋ ماسەلەسى شەشىلەدى. مۇنىڭ ءبارى اكادەميانىڭ جۇمىسىنا تىڭ سەرپىن بەرىپ، بەدەلىن ارتتىرادى. سونداي- اق، ەلىمىزدەگى عىلىم سالاسىنىڭ تۇراقتى دامۋىنا جول اشادى»، - دەدى قاسىم- جومارت توقايەۆ.
