داۋرەن ابايەۆ «يرينا قايراتوۆنا» توبى تۋرالى پىكىر ءبىلدىردى
«يرينا قايراتوۆنا» توبىنىڭ وقيعاسىنا قاتىستى، ارتىستەردىڭ ساحناعا ماس بولىپ شىققانى ءۇشىن جاۋاپكەرشىلىك ەنگىزەسىزدەر مە؟»، - دەپ سۇراق قويدى تىلشىلەر ۇكىمەت وتىرىسىنان كەيىنگى سۇحباتتا.
«شىن مانىندە ەلىمىزدە مىڭداعان كونسەرتتەر وتەدى، وسىنداي وقيعالار دا بولىپ جاتادى. ءبىراق مىڭداعان ارتىستەردىڭ ءبارى ساحنادا ورەسكەل قىلىق كورسەتىپ جۇرگەن جوق. بۇل ماسەلەنى جاقسى بىلەمىز جانە قاراستىرىپ جاتىرمىز. جاقىن ارادا وسى باعىتتا نە ىستەيتىنىمىز تۋرالى ناقتى ناتيجەلەر بەرەمىز دەپ ويلايمىن. ماسەلە ءالى تالقىلانىپ جاتىر. كىم كىمگە شاعىم ءتۇسىرۋى كەرەك، پوليتسياعا كىم حابارلاۋى كەرەك، جاۋاپكەرشىلىك كىمدە، ءالى ەشتەڭە بەلگىسىز»، - دەپ جاۋاپ بەردى د. ابايەۆ.
سونىمەن بىرگە مينيسترگە رەسەيلىك تيكتوكشىلاردىڭ كوپتەپ كەلىپ جاتقانى، ولاردىڭ دا ماساڭ كۇيدە جۇرەتىنى، كوپ تارتىپسىزدىككە باراتىنى جانە قالاي قاداعالاتىنى تۋرالى سۇراق قويىلدى. «زاڭ بارىنە ورتاق. تيكتوكشى بولا ما، باستىق نەمەسە قاتارداعى ادام بولسا دا، زاڭ مەن نورمالار انىق جازىلعان. شارتتى تۇردە ايتساق، رەسەيلىك تيكتوكشىلار ءتارتىپ بۇزسا، ەلىمىزدىڭ زاڭى بويىنشا جاۋاپقا تارتىلادى. ال ءوزىن ءتارتىپتى ۇستاسا - قانداي ماسەلە كورىپ تۇرسىزدار؟»، - دەدى د. ابايەۆ.
اۆتور: ايجان سەرىكجان قىزى
