س ق و-دا ميوكارد ينفاركتىسىنەن قايتىس بولعاندار سانى كۇرت ارتتى
س ق و- نىڭ كارديولوگيالىق ورتالىق قارقىندى تەراپيا بلوگىنىڭ مەڭگەرۋشىسى ميحايل تەليۋكتىڭ ايتۋىنشا، ميوكارد ينفاركتى نەمەسە جۇرەك ۇستاماسى قان تامىرىنىڭ جۇرەك بۇلشىق ەتىن قاجەتتى وتتەگىمەن قامتاماسىز ەتە الماۋىنان داميتىن ميوكاردتىڭ يشەميالىق نەكروزى، ياعني ءولى ەتتەنۋ وشاعىنىڭ پايدا بولۋى.
«وڭىردە بىلتىر 279 ادام ءجىتى ميوكارد ينفاركتىسى بويىنشا ديسپانسەرلىك ەسەپكە الىندى. 2020 -جىلى 2449 ادام اۋىرسا، وتكەن جىلى وسى دەرتپەن 2440 ناۋقاس دارىگەرگە قارالدى. بۇگىندە ميوكارد ينفاركتىسى كەڭ تاراعان جانە ول ناۋقاستىڭ كەنەتتەن ءولىپ كەتۋىنىڭ نەگىزگى سەبەبىنە اينالعان. ينفاركت پروبلەماسى ءالى تولىق شەشىلگەن جوق جانە بۇل اۋرۋدان ءولىپ كەتۋشىلەردىڭ سانى ارتىپ كەلەدى»، - دەيدى ميحايل تەليۋك.
س ق و- دا جۇرەك ۇستاماسىنان 2020 -جىلى 12 ادام، بىلتىر 9 ادام قايتىس بولدى. ال بيىلعى ءۇش ايدىڭ ىشىندە كوز جۇمعاندار سانى 20-عا جەتكەن.
«جۇرەك ۇستاماسى ويدا- جوقتا ۇستامايدى. بۇل دەرتكە جۇرەكتىڭ يشەميالىق اۋرۋى، كورونارلىق ارتەريالاردىڭ اتەروسكلەروزى نەمەسە باسقا پاتولوگيا سەبەپ بولادى. ماسەلەن، ترومب - ۇيىعان قان اتەروسكلەروزدان تارىلعان كورونارلىق ارتەريانى بىتەپ تاستايدى. سالدارىنان ميوكاردقا وتتەگى بارمايدى، ۇزاق ۋاقىت وتتەگىمەن قانىقپاعاندىقتان بۇلشىق ەت جاسۋشىلارى ولە باستاپ، جۇرەكتى زاقىمدايدى. سونداي-اق ونىڭ تۋىنداۋىنا شامادان تىس تاماقتانۋ، قيمىل- قوزعالىستىڭ ازدىعى، گيپەرتونيكالىق اۋرۋلار، جاعىمسىز ادەتتەر، سونىڭ ىشىندە شىلىم شەگۋ اسەر ەتەدى»، - دەيدى كارديولوگ دارىگەر.
ماماننىڭ ايتۋىنشا، جۇرەك ۇستاماسى ۇستاعان كەزدە ءبىر ساعاتقا جۋىق كەۋدەنىڭ ارتقى جاعى قاتتى كۇيدىرىپ، قىسىپ، باتىپ، تىرناپ اۋىرادى. كوبىنەسە اۋىرسىنۋ سول جاق يىق، جاۋىرىن استى مەن قولعا بەرىلەدى. ناۋقاستان سۋىق جابىسقاق تەر شىعىپ، قورقىنىش سەزىمى، السىزدىك، ەنتىگۋ پايدا بولادى ەكەن.
«بەلگىلەرى پايدا بولعاندا بىردەن جەدەل جاردەم قىزمەتىن شاقىرۋ قاجەت. اۋرۋحاناعا جاتقىزعانعا دەيىن ءتىل استىنا نيتروگليتسەرينننىڭ ءبىر تابلەتكاسىن سالىپ، 0,25-0,35 گ اسپيرين ىشكىزۋ كەرەك. ميوكارد ينفاركتىسىنىڭ الدىن الۋعا بولادى. ول ءۇشىن ەڭ الدىمەن تەمەكىنى تاستاعان ءجون. مايلى تاماقتاردان باس تارتۋ، تۇزدى پايدالانۋ مولشەرىن ازايتۋ، قۇرامىندا كالييى مول تاماقتاردى كوپ پايدالانۋ، كوكەنىس پەن جەمىس- جيدەكتەرگە باسىمدىق بەرۋ، دەنە بەلسەندىلىگىن ارتتىرۋ، سەمىزدىكتەن ساقتانۋ، قانداعى حولەستەرين قۇرامىن ۇنەمى تەكسەرىپ، باقىلاپ وتىرۋ قاجەت. اۋرۋدى ەمدەگەننەن، ونىڭ الدىن العان دۇرىس»، - دەيدى ميحايل تەليۋك.
اۆتور: اقەركە داۋرەنبەك قىزى
