اتامىزدىڭ جەرلەنگەن جەرىن بىلمەيمىز - قۋعىن-سۇرگىن قۇربانىنىڭ شوبەرەسى

1937 -جىلى تەك شىعىس قازاقستان وبلىسىنىڭ وزىندە 1350 ادام قاماۋعا الىنىپ، 300 ادام اتۋ جازاسىنا كەسىلگەن. قۋعىن-سۇرگىنگە ۇشىراعانداردىڭ ءبىرىنىڭ ۇرپاعى - سۆەتلانا فۋتكوماز، دەپ حابارلايدى قازاقپارات ءتىلشىسى.

وتكەن عاسىردىڭ ورتاسىنا قاراي قازاقستان جەرى ۇلكەن ءبىر تۇرمەگە اينالىپ، الجير، ستەپلاگ، كارلاگ سياقتى ءىرى كولونيالار پايدا بولدى. ەلىمىزدە ەسىمدەرى قارالى پاراق بەتتەرىندە جازىلعان جانە ومىرلەرى اسا قاتىگەزدىكپەن قيىلعان جانداردىڭ تۋعان-تۋىسقاندارى جىل سايىن 31-مامىردا تاريحقا ءۇڭىلىپ، اتا-اپالارىن ەسكە الادى.

سۆەتلانا فۋتكوماز قازىر شەمونايحا اۋدانىندا تۇرىپ جاتىر.

«تالاي جىلدار بويى ءبىز 1878 -جىلى تۋعان ۇلكەن اتامىز ۆيكۋلا بوريسوۆ جايلى ەشتەڭە بىلمەي كەلدىك. اجەم اكەسىن 1937 -جىلى ن ك ۆ د قىزمەتكەرلەرى الىپ كەتىپ، كەيىن ءىز-ءتۇزسىز جوعالعانىن ايتىپ بەرگەن. ۇلكەن اتامىز شەمونايحا اۋدانىندا ۇبە وزەنى ارقىلى وتەتىن پارومدا جۇمىس ىستەدى. وسى اۋداندا تۇرىپ، قاراپايىم شارۋا بولعان. تەك 2017 -جىلى عانا ءبىز اتامىزدىڭ قايتىس بولعانى تۋرالى تاريحي قۇجاتتاردى مۇراعاتتان ىزدەپ تاپتىق. ۇلكەن اتامىز ن ك ۆ د- مەن تۇتقىندالىپ، كىنالى دەپ تانىلىپ، ءبىر اپتادان كەيىن اتىلىپ كەتكەن ەكەن. سول قۇجاتتاردى قولىما الىپ، وقىپ وتىرعان كەزدە كوزىمنەن جاس توقتاماي اقتى»، - دەپ اڭگىمەلەپ بەردى اۋداندىق گازەت ءتىلشىسى س. فۋتكوماز ش ق و بويىنشا قىلمىستىق- اتقارۋ جۇيەسى دەپارتامەنتى وۆ 156/6 مەكەمەسىنىڭ قىزمەتكەرلەرىنە.

سۆەتلانا سول كەزدە قاراپايىم شارۋانىڭ جوق بولىپ كەتىپ، ەشقانداي سوت ۇكىمىنسىز اتىلۋى وتە وكىنىشتى ەكەنىن ايتادى.

«سول زاماندا سەبەپتەن-سەبەپسىز ساياسي قۋعىن-سۇرگىنگە ۇشىراعان ادام سانى كوپ بولدى. ءتىپتى قازىرگە دەيىن اتامىزدىڭ جەرلەنگەن جەرىن بىلمەي وتىرمىز. بۇل - ءبىزدىڭ تاريحىمىز. ال تاريح ماڭگى ەسىمىزدە قالادى»، - دەدى ساياسي قۋعىن-سۇرگىنگە ۇشىراعان تۇلعانىڭ شوبەرەسى.

اۆتور: تالعاتجان مۇحامەتبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى