تۇركىستان وبلىسىنىڭ ەكى تۇرعىنى مەديتسينا مەكەمەلەرىنەن اقشا بوپسالاپ كەلگەن
ولار ماقتاارال جانە جەتىساي اۋداندارىندا ورنالاسقان مەديتسينا مەكەمەلەرىنىڭ قارجىلىق قىزمەتى تۋرالى مالىمەتتى تاراتپاس ءۇشىن اقشا تالاپ ەتكەن، دەپ حابارلايدى قازاقپارات ءتىلشىسى.
«كريمينالدىق پوليتسيا باسقارماسىنا مەديتسينا مەكەمەسىنىڭ ءبىرىنىڭ قىزمەتكەرى ارىزبەن جۇگىندى. ونىڭ ايتۋىنشا، بەلگىسىز بىرەۋلەر مەكەمە ابىرويىنا نۇقسان كەلتىرەتىن مالىمەتتەردى جاريا ەتەمىز، باقىلاۋشى ورگانداردىڭ جوسپاردان تىس تەكسەرۋىن ۇيىمداستىرامىز دەپ قورقىتىپ، ودان 32 ميلليون تەڭگە بوپسالاعان. اتالعان جايتتى پوليتسەيلەر ق ر ق ك- ءنىڭ 194-بابى 4-بولىگى «اسا ءىرى مولشەردەگى بوپسالاۋ» بويىنشا سوتقا دەيىنگى تەرگەپ- تەكسەرۋدىڭ ءبىرىڭعاي تىزىلىمىنە تىركەدى. قىلمىستىق توپتى ۇستاۋ جانە قىلمىستى اشۋ ماقساتىندا تۇركىستان وبلىسى بويىنشا پ د كريمينالدىق پوليتسيا باسقارماسى مەن ق ر ۇلتتىق قاۋىپسىزدىك كوميتەتى دەپارتامەنتىنىڭ قىزمەتكەرلەرىنەن ارنايى توپ قۇرىلىپ، كەزەك كۇتتىرمەيتىن تەرگەۋ جۇمىستارى كەشەنى جۇرگىزىلدى. جەدەل- ىزدەستىرۋ ءىس- شارالارى كەزىندە جەتىساي قالاسىنداعى ءدامحانالاردىڭ بىرىندە ءىرى كولەمدە اقشا قاراجاتىن بوپسالاپ، الىپ جاتقان جەتىساي قالاسىنىڭ تۇرعىنىن ۇستادىق. كۇدىكتىدەن ايعاقتى زات رەتىندە 32 ميلليون تەڭگە كولەمىندە اقشا تاركىلەدىك»، - دەپ اتاپ ءوتتى وبلىستىق پوليتسيا دەپارتامەنتى باستىعىنىڭ ورىنباسارى قۇرمانبەك ساحوۆ.
قۇرمانبەك ساحوۆتىڭ ايتۋىنشا، سەزىكتىنىڭ سىبايلاسى شىمكەنت قالاسىنان ۇستالعان.
«شىمكەنت قالاسىنداعى مەكەمەلەردىڭ ءبىرىنىڭ جانىندا وتكىزىلگەن تەرگەۋ ارەكەتتەرىنىڭ ناتيجەسىندە تۇركىستان وبلىستىق پد كريمينالدىق پوليتسيا باسقارماسىنىڭ جەدەل ۋاكىلدەرى، ۇ ق ك د قىزمەتكەرلەرى جانە شۇعىل ارەكەت ەتۋ ارنايى جاساعى بىرلەسىپ، ەكىنشى كۇدىكتى - ماقتاارال اۋدانىنىڭ تۇرعىنىن ۇستادىق. بۇگىندە كۇدىكتى ەكەۋ ۋاقىتشا ۇستاۋ يزولياتورىنا قاماۋعا الىندى. قازىرگى ۋاقىتتا ۇستالعاندارعا قاتىستى قاجەتتى جەدەل- تەرگەۋ امالدارى جۇرگىزىلۋدە»، - دەدى پ د باستىعىنىڭ ورىنباسارى ق. ساحوۆ.
اۆتور: اينۇر اقبايەۆا
