باتىس قازاقستاندا ءتورت ادامعا قاسقىر شاپتى

وقيعا 7- مامىر كۇنى شىڭعىرلاۋ اۋىلدىق وكرۋگىنە قاراستى اۋدان ورتالىعىنان 15 شاقىرىم جەردە ورنالاسقان شوقتىباي ەلدى مەكەنىندە بولدى، دەپ حابارلايدى قازاقپارات ءتىلشىسى.

شىڭعىرلاۋ اۋداندىق ىشكى ساياسات بولىمىنەن تۇسكەن مالىمەتكە قاراعاندا، 7- مامىر كۇنى ساعات 21:30 شاماسىندا Whatsapp توبىندا تۇرعىندار ءبىر- بىرىنە اۋىلدا قاسقىر جۇرگەنىن حابارلاپ، ساق بولۋ كەرەكتىگىن ەسكەرتەدى. ءتۇز تاعىسىنىڭ بىرنەشە تۇرعىنعا شابۋىل جاساعانى انىقتالعاننان كەيىن ەر ازاماتتار جينالىپ، ىزدەستىرىپ، قاسقىردىڭ كوزىن جويعان. جىرتقىشتىڭ باسى زەرتتەۋ جۇمىستارىن جۇرگىزۋ ءۇشىن اۋداندىق ۆەتەرينارلىق ستانسيا قىزمەتكەرلەرىنە تاپسىرىلدى.

جاراقات الىپ، قاسقىردىڭ ءتىسى تيگەن ەكى ەر، ءبىر ايەل ادام جانە ءبىر بالا اۋداندىق اۋرۋحاناعا جەتكىزىلدى. جالپى، اتالعان ەلدى مەكەن تۇرعىندارى بيىل بۇدان بۇرىن دا بىرنەشە رەت 5-7 قاسقىر كورگەندىگىن ايتىپ، ءتيىستى شارا قابىلداۋدى سۇراعان. بۇل تۋرالى 8- مامىر كۇنى سول شوقتىباي اۋىلىندا وتكەن جيىندا بەلگىلى بولدى.

«تولىق ەكپە سالىنعان ءۇش ادام امبۋلاتورلىق ەم الۋ ءۇشىن ۇيلەرىنە جىبەرىلدى. قولى جاراقاتتانعان جاسى 50-لەردەگى ايەل اۋرۋحانادا جاتىر. زەرتتەۋ قورىتىندىسىنا سايكەس ولاردىڭ ءبارى دە ەمدەۋ كۋرسىنان وتەدى. وعان قوسا، قاسقىرمەن بايلانىستا بولعان تاعى 6 ادامعا ەكپە سالىندى»، - دەدى قازاقپارات تىلشىسىنە اۋداندىق اۋرۋحانانىڭ باس دارىگەرى قىلىش جازىقبايەۆ.

اۆتور: ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى