قاستەرلى تاۋەلسىزدىگىمىزدى باعالاي بىلەيىك - ماۋلەن اشىمبايەۆ
پارلامەنت سەناتىنىڭ ءتوراعاسى ماۋلەن اشىمبايەۆ قازاقستاندىقتارعا جەڭىس كۇنى مەرەكەسىنە وراي ارناعان قۇتتىقتاۋىندا وسىلاي دەدى، دەپ حابارلايدى قازاقپارات.
بۇگىن سەنات سپيكەرى پرەزيدەنت قاسىم-جومارت توقايەۆپەن بىرگە «وتان انا» مونۋمەنتىنە گۇل شوقتارىن قويىپ، بابالار رۋحىنا تاعزىم ەتتى.
كەيىن ۇلتىمىزدىڭ داڭقتى پەرزەنتى باۋىرجان مومىش ۇلىنىڭ ەسكەرتكىشىنە ارنايى باردى.
«باۋكەڭ - قازاق ءۇشىن ەرلىك پەن ورلىكتىڭ سيمۆولى. اتى اڭىزعا اينالعان باتىردىڭ تۇلعاسىن ءبىز قاشاندا ارداق تۇتامىز. ەڭسەلى ەلدىك - ەرەن ەرلىكتىڭ ناتيجەسى. سوندىقتان اتالارىمىز بەن اكەلەرىمىزدىڭ داڭقتى جولىن ءاردايىم ۇلىقتاۋ - ءبىزدىڭ پەرزەنتتىك بورىشىمىز. سول سەبەپتى تاياۋدا عانا مەملەكەت باسشىسى ەرلىگى ۋاقىتىندا ەسكەرىلمەگەن باتىرلار تولەۋعالي ابدىبەكوۆكە، الەكساندر نەسميانوۆقا جانە ىبىرايىم سۇلەيمەنوۆكە «حالىق قاھارمانى» اتاعىن بەردى. بۇل - تاريحي ادىلدىكتى قالپىنا كەلتىرۋدىڭ جارقىن كورىنىسى. بەيبىتشىلىك پەن بەرەكە-بىرلىكتىڭ قادىرىن ارتتىراتىن مەرەكەمەن قۇتتىقتاي وتىرىپ، ەلىمىزگە اماندىق، جەرىمىزگە تىنىشتىق تىلەيمىن! ءاردايىم قاستەرلى تاۋەلسىزدىگىمىزدى باعالاي بىلەيىك. جەڭىس كۇنى قۇتتى بولسىن!»، - دەپ جازدى م. اشىمبايەۆ Facebook-تە.
