قازاقتىڭ باس سنايپەرىنىڭ ەسىمى اقىرى اقتالدى - ايگۇل كەمەلبايەۆا مايدانگەر اعاسى جايلى
«ۋاقىت تورەشى. قۇدايدىڭ جازمىشىمەن رەتتەلۋ ومىرگە ءتان قۇبىلىس ەكەن. قازاقتىڭ 1№ سنايپەرى تولەۋعالي ابدىبەكوۆتىڭ ەسىمى اقىرى اقتالىپ، جارىققا شىقتى. بۇكىل ەل قۋاندى. ەر ەلدى ساقتايدى. بۇل - اكسيوما. ونىڭ اتاسى ناسىرحاننىڭ ەسىمى اكەسى بولىپ، اكەسى ابدىبەك فاميلياسى بولىپ جاڭساق جازىلىپ كەتكەن سياقتى. ەستۋىمشە، تولەۋعالي ناسىرحاننىڭ ۇلى ەمەس، ۇلكەن بالاسى ابدىبەكتەن تۋعان نەمەرەسى. تولەۋعالي ابدىبەكوۆتى 3 مارتە كەڭەس وداعىنىڭ باتىرى اتاعىنا ۇسىنعان. ءبىراق نە كەدەرگى بولعان؟ باستى كەدەرگى - ونىڭ حالىق جاۋىنىڭ تۋىسى بولعانىندا.
ول انكەتادا «كەمەلباي اعام رەپرەسسيالانعان» دەپ جاسىرماي جازعان. كەمەلباي - تولەۋعاليدىڭ اكەسى ابدىبەكتىڭ تۋعان ءىنىسى، مەنىڭ اتام، 1910-جىلى تۋىپ، 27 جاسىندا ماگادانعا ايدالىپ كەتە بارعان. ارتىندا ۇلى 2 جاسىندا تۇل جەتىم قالعان، ول - مەنىڭ اكەم جولداسباي ناسىرحانوۆ» دەپ جازدى جازۋشى Facebook پاراقشاسىندا.
ونىڭ سوزىنە سەنسەك، باتىردىڭ ەسىمىن جارىققا شىعارۋعا كوپتەگەن ادامدار اتسالىسقان.
«حالىق قاھارمانى» اتاعىن بەرۋ تۋرالى جارلىققا قول قويعان قازاقستان رەسپۋبليكاسىنىڭ پرەزيدەنتى ق. ك. توقايەۆقا، وسى ساۋالدى پرەزيدەنتكە جەتكىزگەن قوعام قايراتكەرى بەرىك ءابدىعالي جانە مەملەكەتتىك حاتشى ەرلان قارينگە، تىلەۋقور بارشا ازاماتتارعا العىسىم ەرەكشە. ادامزات قوعامى سوعىس جانە بەيبىتشىلىك قۇبىلىسىنان تۇرادى.
ايگىلى سنايپەر ىبىرايىم سۇلەيمەنوۆ ەكەۋىنىڭ ەسىمى ءبىر كۇندە جاڭعىرعانى، جانقيار ەرلىگى وشپەگەنى ۇرپاق ءۇشىن قاجەت.
«سنايپەر» اتتى اڭگىمەم تولەۋعالي اعامنىڭ رۋحىنا ارنالعان. 2015-جىلى جازىلدى. كەيىنىرەك بۇرىن بەلگىسىز بولىپ كەلگەن دەرەكتەرمەن تولىقتىرىپ، قايتا جازدىم. 6- مامىر كۇنى «قازاق ادەبيەتى» گازەتىندە جارىق كوردى» دەيدى ايگۇل كەمەلبايەۆا.
ەسكە سالا كەتەيىك، ەكىنشى دۇنيەجۇزى سوعىسىندا ەرلىكپەن قازا تاپقان ءۇش مايدانگەرگە «حالىق قاھارمانى» اتاعى بەرىلگەنىن حابارلاعان بولاتىنبىز. ونىڭ ىشىندە سۇرمەرگەن تولەۋعالي ابدىبەكوۆكە حالىق جاۋىنىڭ تۋىسى بولعانى ءۇشىن كەڭەس وداعى باتىرى اتاعى بۇيىرماعان.
