سەگىز بالا تاربيەلەپ وتىرعان اسكەري قىزمەتكەر

سونداي-اق ول وتباسىندا سەگىز پەرزەنت تاربيەلەپ وتىرعان ۇلگىلى شاڭىراق يەسى اتانىپ وتىر، دەپ حابارلايدى قازاقپارات ءتىلشىسى.

قونىسبەك بەدەلبەك ۇلى قىزىلوردا قالاسىنداعى ۇلتتىق ۇلاننىڭ №5547-اسكەري ءبولىمىنىڭ اسكەري قىزمەتشىسى. 2008 -جىلدان بەرى قورعانىس سالاسىندا جەمىستى ەڭبەك ەتىپ كەلەدى. بۇگىندە اسكەري بولىمدە قاراۋىل باستىعى- ءبولىنىس باستىعى قىزمەتىن اتقارادى.

ونىڭ جالپى ەڭبەك ءوتىلى 21 -جىلدى قۇرايدى. ءوز قىزمەتىندە مول تاجىريبە جيناقتاعان ول باسشىلىق تاراپىنان وڭ باعالانادى. قونىسبەك قىزمەتتە سەنىمدى دوس، بەدەلدى ارىپتەس. «اسكەري سالا ۇنەمى جاۋاپكەرشىلىكتى قاجەت ەتەدى. سوندىقتان ءاردايىم وتان قورعاۋ جولىندا كىرپىك قاقپاستان قىزمەت ەتىپ كەلەمىز. ازاماتتىق بورىشىن وتەۋگە كەلگەن جاس جاۋىنگەرلەرگە اقىل- كەڭەسىمىزدى ايامايمىز. ولارعا اسكەري ءومىردىڭ قىر-سىرىن ۇيرەتەمىز»، - دەيدى ول. سونداي- اق ول وتباسىندا ۇلگىلى اكە. جارى ايزات نۇرىمبەتوۆا ەكەۋى سەگىز بالانى تاربيەلەپ وتىر. ولاردىڭ زامانبەك، اقبوتا، اقزەرە، سانجار، مەرەكە، زيننۇر، ايشا، ءاسيا ۇل-قىزدارى ءوسىپ كەلەدى. جۇبايى ايزات ءابدىقايىر قىزى قىزىلوردا وبلىستىق تۋبديسپانسەر ورتالىعىندا مەدبيكە بولىپ جۇمىس جاساعان. قازىر ءۇي شارۋاسىندا، بالالاردىڭ تاربيەسىمەن اينالىسادى. ارداقتى انا «كۇمىس» جانە «التىن القا» يەگەرى.

«بەيبىت كۇننىڭ تىنىشتىعى ءبىز ءۇشىن ءاردايىم قىمبات. سول جولدا تىنباي ەڭبەك ەتىپ كەلەمىز. ءاربىر ارايلاپ اتقان تاڭنىڭ باعاسى ولشەۋسىز. سوندىقتان ءاربىرىمىز تۋعان ەلىمىزدىڭ بەيبىتشىلىگى ءۇشىن تىلەۋلەس ەكەنىمىز بەلگىلى»، - دەيدى ول. ونەگەلى وتباسى 2018 -جىلدىڭ جەلتوقسان ايىندا «اسكەري باسپانا» باعدارلاماسى ارقىلى 4 بولمەلى پاتەرگە يە بولعان.

اۆتور: ءادىلجان ۇمبەت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى