قىتايدان بوسقان قازاقتارعا كومەكتەسكەن ادنان مەندەرەسكە كوشە اتى بەرىلدى - فوتو
بۇگىن وسى ايتۋلى وقيعاعا بايلانىستى سالتاناتتى جيىن ءوتىپ، وعان قازاقستان، تۇركيا جانە وزگە دە ەلدەردەن مەيماندار قاتىستى، دەپ حابارلايدى قازاقپارات ءتىلشىسى.
شاراعا قاتىسقان قوناقتار مەن زيالى قاۋىم وكىلدەرى ا. مەندەرەس تۋرالى بايانداپ ءوتتى. تۇركيا رەسپۋبليكاسى ءدىن ىستەرى باسقارماسىنىڭ باسشىسى، باس ءمۇفتي الي ەرباش تاريحي تۇلعاعا قۇرمەت كورسەتكەن قازاق ەلىنە العىسىن ءبىلدىرىپ، تۇركىستاننىڭ تۇركى الەمىنىڭ ورتالىعىنا اينالىپ كەلە جاتقانىنا توقتالدى. ول قوس ەل اراسىنداعى باۋىرلاستىق قارىم- قاتىناس نىعايا تۇسكەنىن، تۇركىستان تورىندەگى ماڭىزدى ءىس- شارالار تۇركى الەمىن بىرىكتىرۋگە سەرپىن بەرەتىنىن ءمالىم ەتتى.
ال ءوڭىر باسشىسى ءومىرزاق شوكەيەۆ باۋىرلاس قازاقستان مەن تۇركيا بايلانىسى تەرەڭدەپ وتىرعانىن جەتكىزدى.
«وتكەن عاسىردىڭ 50-جىلدارى قىتايدان بوسقان وتانداستارىمىزعا قامقورلىق تانىتىپ، تۇركياعا كوشۋىنە، ورنىعۋىنا ۇلەس قوسقان ادنان مەندەرەستىڭ ەسىمىن جاڭعىرتۋ قوس مەملەكەتكە ورتاق مۇددە دەپ بىلەمىن. مەملەكەت باسشىسى قاسىم-جومارت توقايەۆ تۇركىستان قالاسىنداعى كوشەلەردىڭ بىرىنە ادنان مەندەرەستىڭ ەسىمىن بەرۋ تۋرالى تاپسىرما بەرگەن بولاتىن. تاپسىرما اياسىندا زاڭعا سايكەس ءتيىستى جۇمىستار اتقارىلىپ، ءبىز بۇگىن سول كوشەنىڭ اشىلۋ سالتاناتىنا كۋا بولىپ وتىرمىز. وزدەرىڭىزگە بەلگىلى، تۇركىستان - ءبىر حالىقتىڭ عانا ەمەس، كۇللى تۇركى ەلدەرىنىڭ رۋحاني ۇستىنى رەتىندە اسپەتتەلەدى. سوندىقتان، قوس ەلگە ورتاق تۇلعانىڭ اتىنداعى بۇل كوشەنىڭ تۇركىستان قالاسىندا اشىلۋى - زاڭدىلىق. سونداي-اق بۇل باستاما قازاق- تۇرىك اراسىنداعى دوستىقتىڭ ودان سايىن نىعايۋىنا جول اشادى دەپ سەنەمىن»، - دەدى ءومىرزاق شوكەيەۆ.
ادنان مەندەرەس كوشەسىندە جاڭادان بوي كوتەرگەن اكىمشىلىك- ىسكەرلىك ورتالىق، الەۋمەتتىك، كاسىپكەرلىك نىساندار، تۇرعىن ۇيلەر جانە جاڭا مەكتەپ ورنالاسقان. سونىمەن بىرگە ساياباق پەن مادەني نىساندار دا بار. ايتا كەتەيىك، ساياسي قايراتكەر، تۇركيا رەسپۋبليكاسىنىڭ پرەمەر- ءمينيسترى قىزمەتىن اتقارعان ادنان مەندەرەستىڭ قازاق حالقىنا سىڭىرگەن ەڭبەگى مول. ول وتكەن عاسىردىڭ 50-جىلدارى قازاقتاردىڭ تۇركياعا قونىستانۋىنا سەبەپكەر بولىپ، 4 جىلعا جۋىق سوزىلعان قونىس اۋدارۋ پروتسەسىنە قولداۋ كورسەتتى. تاريحي تۇلعانىڭ 1952 -جىلعى قاۋلىسىنان كەيىن قازاقتار پاكىستاننان تۇركياعا قونىس اۋدارا باستادى. پاكىستانداعى قازاقتاردىڭ العاشقى لەگى 1952 -جىلدىڭ قىركۇيەك ايىندا كەلسە، سوڭعى لەگى 1956 -جىلى تۇرىك جەرىنە جەتكەن.
اۆتور اينۇر اقبايەۆا
