تۇرمەگە جاسىرىن كامەراسى بار كوزىلدىرىك كىرگىزىلمەك بولعان
سوتتالعانداردىڭ ءبىرىنىڭ اتىنا پوشتامەن كەلگەن باندەرولدى تەكسەرۋ بارىسىندا جاسىرىن ميكرو- بەينەباقىلاۋ كامەراسى ورناتىلعان كوزىلدىرىك تاركىلەندى. وقيعا ورنىنا جەدەل- تەرگەۋ توبى جەتىپ، ماتەريالدار پروتسەسسۋالدىق شەشىم قابىلداۋعا جولداندى.
«جىل باسىنان بەرى شىمكەنت قالاسى مەن تۇركىستان وبلىسى بويىنشا قىلمىستىق- اتقارۋ جۇيەسىنىڭ قىزمەتكەرلەرى سالەمدەمەلەر مەن باندەرولدەر ارقىلى كەلەتىن تىيىم سالىنعان زاتتاردى بەرۋدىڭ 20-دان استام ارەكەتىنىڭ جولىن كەستى. كوبىنەسە ولار - ەسىرتكى زاتتارى مەن ۇيالى تەلەفوندار. الايدا، ءبىز ءۇشىن مۇنداي ەرەكشە قۇرىلعىنىڭ تاركىلەنۋى العاش رەت بولىپ وتىر. بۇعان دەيىن وڭىردە وسىعان ۇقساس فاكتىلەر تىركەلمەگەن»، - دەيدى وڭىرلىك ق ا ج دەپارتامەنتى.
«توسىن سىيى» بار سالەمدەمە اۋىر جانە اسا اۋىر قىلمىستار (ادام ۇرلاۋ، بوپسالاۋ، تەرروريزم) ءۇشىن 14 جىلعا سوتتالعان جازاسىن وتەۋشىنىڭ اتىنا كەلگەن. دەپارتامەنتتىڭ مالىمدەۋىنشە، ەسكەرتۋلەر مەن زاڭسىز ءىس- ارەكەتتەرگە قارسى جۇرگىزىلەتىن شارالارعا قاراماستان، پەنيتەنتسيارلىق مەكەمەنىڭ اۋماعىندا پايدالانۋعا تىيىم سالىنعان زاتتاردىڭ ءتۇسۋى توقتاماي تۇر. بۇعان دەيىن قىزىلوردادا تۇرمەگە پالاۋ اراسىنا 3 تەلەفون جاسىرىپ وتكىزبەك بولعان ادام ۇستالعان ەدى.
