تۇرىكمەنستان باسشىسىنا ق ر پرەزيدەنتىنىڭ ا ءو س ش ك سامميتىنە شاقىرۋى تابىستالدى
ق ر سىرتقى ىستەر مينيسترلىگىنەن ءمالىم ەتكەندەي، بۇگىن اسقار تاجىبايەۆ تۇرىكمەنستان باسشىسىنا سەنىم گراموتالارىن تابىستادى. بۇدان بولەك، ەلشى س. بەردىمۇحامەدوۆكە قازاقستان پرەزيدەنتى قاسىم- جومارت توقايەۆتىڭ اتىنان 2022 -جىلعى 12-13-قازاندا نۇر- سۇلتان قالاسىندا وتەتىن ازياداعى ءوزارا ءىس- قيمىل جانە سەنىم شارالارى كەڭەسىنىڭ سامميتىنە قاتىسۋعا شاقىرۋ حاتىن تابىس ەتتى. تۇرىكمەنستان باسشىسى شاقىرۋدى ريزاشىلىقپەن قابىلدادى.
«رەسمي راسىمنەن كەيىنگى سۇحبات بارىسىندا تاراپتار قازاقستان- تۇرىكمەن قاتىناستارىنىڭ جوعارى دەڭگەيىن قاناعاتتانۋشىلىقپەن اتاپ ءوتتى. ساياسي، ساۋدا- ەكونوميكالىق جانە مادەني- گۋمانيتارلىق سالالارداعى ەكىجاقتى ىنتىماقتاستىقتىڭ وزەكتى ماسەلەلەرى تالقىلاندى. قازاقستان پرەزيدەنتى قاسىم- جومارت توقايەۆتىڭ اشعاباتقا مەملەكەتتىك ساپارىنىڭ، سونداي- اق ورتالىق ازيا مەملەكەتتەرى باسشىلارىنىڭ ءۇشىنشى كونسۋلتاتيۆتىك كەزدەسۋ اياسىنداعى ەكى ەل باسشىلارى كەزدەسۋىنىڭ قورىتىندىسى بويىنشا قول جەتكىزىلگەن ۋاعدالاستىقتاردى ىسكە اسىرۋ ماسەلەسىنە ەرەكشە نازار اۋدارىلدى»، - دەلىنگەن تاراتىلعان مالىمەتتە.
