رادياتسيالىق جانە بيولوگيالىق قورعاۋ بولىمشەلەرى ۇرىسقا جاقىنداتىلعان جاعدايدا جاتتىقتى
جاتتىعۋعا 400-دەن استام اسكەري قىزمەتشى جانە ر ح ب ق بولىمشەلەرىنىڭ 70-تەن استام ارنايى تەحنيكاسى جۇمىلدىرىلدى. تۇراقتى ورنالاسۋ پۋنكتەرىنەن بەلگىلەنگەن اۋدانعا بەت العان اسكەرلەر باراتىن باعىتتارى مەن كورسەتىلگەن اۋماقتارعا رادياتسيالىق، حيميالىق جانە بيولوگيالىق بارلاۋ جۇرگىزدى. بولىمشەلەر كەلگەن سوڭ جەرگىلىكتى جەرلەرگە ر ح ب باقىلاۋ بەكەتتەرى قويىلدى.
وقۋ- جاتتىعۋدىڭ پراكتيكالىق بولىمىندە زاقىمداۋ جاعدايىنداعى ءىس- قيمىل ءتارتىبى پىسىقتالىپ، قارۋ- جاراق پەن اسكەري تەحنيكا دا ارنايى وڭدەلدى. اسكەرلەر شابۋىلداۋ ارەكەتتەرىن جۇرگىزۋ كەزىندە نىساندار اەروزولمەن بۇركەمەلەندى، ال ر ح ب ق اسكەرلەرىنىڭ رەاكتيۆتى جاياۋ اسكەر وتشاشقىش ەسەپتوپتارى شارتتى قارسىلاستىڭ جۇمىس كۇشى مەن تەحنيكاسىن جويۋعا قاتىستى. سونداي- اق، ر ح ب ق بولىمشەلەرى ت ج م اۋماقتىق ورگاندارىمەن بىرلەسىپ تەحنوگەندىك سيپاتتاعى توتەنشە جاعدايلاردىڭ سالدارىن جويۋ ماسەلەلەرىن پىسىقتادى.
«رادياتسيالىق، حيميالىق جانە بيولوگيالىق قورعاۋ - جاۋىنگەرلىك قامتاماسىز ەتۋدىڭ ءبىر ءتۇرى. سوندىقتان، بولىمشەلەرىمىزدىڭ قاتىسۋىنسىز ءىس جۇزىندە بىردە- ءبىر وقۋ- جاتتىعۋ وتكىزىلمەيدى»، - دەپ اتاپ ءوتتى رادياتسيالىق، حيميالىق، بيولوگيالىق قورعاۋ جانە ەكولوگيالىق قاۋىپسىزدىك اسكەرلەرى دەپارتامەنتىنىڭ باستىعى پولكوۆنيك ەرجان قۇلماعامبەتوۆ.
سونىمەن قاتار، بۇل اسكەر ءتۇرىن جەتىلدىرۋ ەل پرەزيدەنتى - قارۋلى كۇشتەردىڭ جوعارعى باس قولباسشىسى قاسىم- جومارت توقايەۆتىڭ «قوس ماقساتتاعى» كومپونەنتتەردى دامىتۋ قاجەتتىلىگى تۋرالى تاپسىرماسىنا سايكەس جۇرگىزىلىپ جاتقانى اتالىپ ءوتتى. بۇعان دەيىن تەڭىز جاياۋ اسكەرىنىڭ قالا ىشىندە ۇرىس جۇرگىزۋ بويىنشا جاتتىعۋ وتكىزگەنى جازىلعان.
