سوت ورىنداۋشىلارىنىڭ ارەكەتتەرى مەن ارەكەتسىزدىگىنە قاتىستى ارىز ازايماي تۇر
بۇل تۋرالى ءماجىلىس ءتوراعاسىنىڭ ورىنباسارى بالايىم كەسەبايەۆا ايتتى، دەپ حابارلايدى قازاقپارات ءتىلشىسى.
«اتقارۋشىلىق ءىس جۇرگىزۋ ساپاسىن جاقسارتۋ بويىنشا قابىلدانىپ جاتقان زاڭدارعا جانە باسقا شارالارعا قاراماستان، جەكە سوت ورىنداۋشىلاردىڭ ارەكەتتەرىنە شاعىمداردىڭ سانى ازايماي وتىر. جوعارعى سوتتىڭ اقپاراتىنا سايكەس سوڭعى 3 جىلدا سوتقا بەرىلگەن شاعىمداردىڭ سانى 10 مىڭنان استام بولدى. بۇل - ۋاكىلەتتى ورگاننىڭ اتىنا ءتۇسىپ جاتقان شاعىمداردى ەسەپكە الماعانداعى كورسەتكىش»، - دەدى ول بۇگىن ماجىلىستەگى ۇكىمەت ساعاتى بارىسىندا.
سونىمەن قاتار ول دەپۋتاتتاردىڭ اتىنا دا تۇراقتى نەگىزدە شاعىمدار ءتۇسىپ جاتقانىن ايتتى. «شاعىمداردىڭ باسىم بولىگى اتقارۋشى قۇجاتتارىنىڭ ۇزاق ۋاقىت بويى نەگىزسىز ورىندالماۋى، سونىڭ ىشىندە سوت ورىنداۋشىلارىمەن ءىس بويىنشا ءتيىستى ماجبۇرلەۋ شارالارىن قابىلداماۋىنا قاتىستى. ستاتيستيكا بويىنشا سوتتارعا تۇسكەن اكىمشىلىك تالاپ ارىزدارىنىڭ جالپى سانىنىڭ اراسىندا ەڭ كوبى - سوت ورىنداۋشىلارىنىڭ ارەكەتتەرى مەن ارەكەتسىزدىگىنە قاتىستى ىستەر بويىنشا بولىپ وتىر. سوڭعى 9 اي ىشىندە تۇتاستاي العاندا، رەسپۋبليكادا 6 مىڭنان استام تالاپ ارىز تۇسكەن»، - دەدى بالايىم كەسەبايەۆا.
ونىڭ اتاپ وتۋىنشە، شاعىمداردىڭ كوپتىگى بورىشكەرلەردىڭ سوت شەشىمدەرىنىڭ ورىندالۋىن سوزۋ ماقساتىندا مۇنداي شاعىمداردى قاساقانا بەرۋىنە دە بايلانىستى بولىپ وتىر.
«بورىشكەردىڭ مۇنداي ارەكەتتەرى ەكىنشى تاراپ قۇقىقتارىنىڭ بۇزىلۋىنا الىپ كەلەدى. ءبىزدىڭ ماقساتىمىز - زاڭ شىعارۋ سۋبەكتىسى رەتىندە وسىنداي پروبلەمالاردى انىقتاۋ جانە شەشۋ»، - دەدى ۆيتسە-سپيكەر.
