نۇر- سۇلتاندا بالاباقشانىڭ اي سايىنعى تولەماقىسى قىمباتتاۋى مۇمكىن

بۇل تۋرالى قالالىق ءبىلىم باسقارماسىنىڭ باسشىسى قاسىمحان سەنعازييەۆ ءمالىم ەتتى، دەپ حابارلايدى قازاقپارات ءتىلشىسى.

بۇگىن نۇر- سۇلتان قالاسى ۇلتتىق كاسىپكەرلەر پالاتاسى جانە قالالىق ءبىلىم باسقارماسىنىڭ ۇيىتقى بولۋىمەن ەلوردا مەكتەپتەرى، بالاباقشالارىندا قوسىمشا ورىننىڭ قاجەتتىلىگى جانە ءبىلىم بەرۋ ۇيىمدارىنىڭ باسقا دا پروبلەمالارىنا ارنالعان وتىرىس ءوتتى. اتالعان شارادا ەلوردالىق جەكە بالاباقشالاردىڭ وكىلدەرى اتا- انالار تولەيتىن اقىنىڭ ازدىعىن ايتىپ، ماسەلەنى ورتاعا سالدى. وعان قاتىستى قالالىق ءبىلىم باسقارماسىنىڭ باسشىسى قاسىمحان سەنعازييەۆ پىكىر ءبىلدىردى.

«اتا- انالاردىڭ بالاباقشاعا بەرەتىن تولەمىنىڭ كولەمى 2016 -جىلدان بەرى وزگەرمەگەن. ياعني اتا- انا بالاباقشاعا اي سايىن - مەملەكەتتىك بولسا 16800 تەڭگە، ال جەكە بولسا - 20800 تەڭگە تولەيدى. اتا- انا بەرگەن بۇل تولەمگە بالانىڭ تاماعى عانا كىرەدى. بالاباقشادا كۇنىنە 4 مەزگىل اس بەرىلەدى. بۇل ەرەجە مەملەكەتتىك جانە جەكە بالاباقشا ءۇشىن دە ورتاق. وسى ورايدا ءبىز قازىر اتا- انا تولەمىن قايتا قاراپ، ەسەپتەپ جاڭا قۇجات دايىنداپ جاتىرمىز»، - دەيدى ول.

باسقارما باسشىسىنىڭ ايتۋىنشا، قۇجات دايىن بولعان سوڭ، قوعام تالقىسىنا، ودان ءارى قالالىق ءماسليحاتتىڭ قاراۋىنا ۇسىنىلادى.

«جاڭا قۇجات ماقۇلدانسا باعا وزگەرەدى. ءبىراق، بۇل جاڭالىق مەملەكەتتىك بالاباقشاعا عانا قاتىستى. ال جەكە بالاباقشا بويىنشا ماسەلەنى بولەك قاراستىراتىن بولامىز»، - دەدى ق. سەنعازيەۆ.

بۇعان دەيىن قالالىق ءبىلىم باسقارماسىنىڭ باسشىسى ەلوردادا 2025 -جىلدان باستاپ كاسىبي تەحنيكالىق ءبىلىم تولىقتاي تەگىن بەرىلەتىنىن ءمالىم ەتتى.

اۆتور: ءالي يبرايەۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى