پرەزيدەنت قاڭتار وقيعالارىن تەرگەۋ بارىسىن ۇنەمى جاريالاپ وتىرۋدى تاپسىردى
بۇل تۋرالى ق ر پرەزيدەنتى قاسىم-جومارت توقايەۆ قازاقستان حالقىنا جولداۋىندا ايتتى، دەپ حابارلايدى قازاقپارات ءتىلشىسى.
«اشىعىن ايتساق، قازىر قوعامدا ءتۇرلى قاۋەسەت تاراۋدا. بۇل احۋال جالعان تۇسىنىستىك قالىپتاستىرىپ، ەلدى اداستىرادى. سوندىقتان وتكەن وقيعالار تۋرالى ناقتى مالىمەتتى جاريالاپ، وعان باعا بەرۋ وتە ماڭىزدى. ءتىپتى، قاسيەتتى پارىزىمىز دەۋگە بولادى. جۇرت ونىڭ استارىنا ءۇڭىلىپ، سەبەبىن تەرەڭ ءتۇسىنۋى قاجەت. كۇنى كەشە عانا پارلامەنت قابىرعاسىندا ارنايى تىڭداۋ ءوتتى. وندا قۇقىق قورعاۋ ورگاندارى تەرگەۋ قورىتىندىلارى تۋرالى تولىق ەسەپ بەردى. تۋراسىن ايتقاندا مۇنداي كەڭ اۋقىمدى تالقىلاۋ ەشقاشان بولماعان»، - دەدى ق ر پرەزيدەنتى.
مەملەكەت باسشىسى تالقىلاۋ بارىسىندا دەپۋتاتتارعا جانە بۇقارالىق اقپارات قۇرالدارىنا ءبارى اشىق ايتىلعانىن اتاپ ءوتتى.
«قوعامدى مازالاعان سۇراقتارعا جاۋاپ بەرىلدى. بۇل قاڭتار وقيعاسىنا ءادىل باعا بەرۋگە ەڭ الدىمەن بيلىكتىڭ مۇددەلى ەكەنىن كورسەتەدى. مەن مۇنى تولىق قولدايمىن. ءبىز اقيقاتتى ايتۋىمىز كەرەك. بۇل مەنىڭ جەكە قاعيداتىم. قازىر تەرگەۋ جۇمىستارى جۇرگىزىلىپ جاتىر. وسى ماسەلەمەن ارنايى مەكەمەارالىق شۇعىل تەرگەۋ توبى اينالىسۋدا. قۇقىق قورعاۋ ورگاندارىنا جاسالىپ جاتقان جۇمىس ناتيجەسىن ۇنەمى جاريالاپ وتىرۋدى تاپسىرامىن» - دەدى قاسىم-جومارت توقايەۆ.
اۆتور: مارلان جيەمباي
