رەسەي سانكسيالارىنا بايلانىستى قازاقستاندا كاسىپكەرلەردىڭ ماسەلەلەرىنە ارنالعان جەدەل شتاب قۇرىلدى

بۇل تۋرالى «اتامەكەن» ۇلتتىق كاسىپكەرلەر پالاتاسىنىڭ نۇر-سۇلتان قالاسى بويىنشا فيليالى ديرەكتورىنىڭ مىندەتىن اتقارۋشى بەيسەن جولبولديەۆ ءمالىم ەتتى، دەپ حابارلايدى قازاقپارات ءتىلشىسى.

«رەسەي فەدەراتسياسىنا سالىنىپ جاتقان ءبىرقاتار سانكسيالاردىڭ قازاقستان ەكونوميكاسىنا اسەرىنە بايلانىستى كاسىپكەرلەرگە ارنالعان جەدەل شتاب قۇرىلدى. «اتامەكەن» ۇلتتىق كاسىپكەرلەر پالاتاسىنىڭ جانىنان قۇرىلعان جەدەل شتابقا كاسىپكەرلەر ءوز سالاسى بويىنشا ءتۇيىندى ماسەلەلەردى جەتكىزە الادى»، - دەدى بەيسەن جولبولديەۆ «اتامەكەن» ۇ ك پ-دا ونلاين وتكەن باسپا ءسوز ءماسليحاتىندا.

ونىڭ ايتۋىنشا، جەدەل شتاب ەلوردادا قۇرىلعان جانە وعان وڭىرلەردەن دە حابارلاسۋعا بولادى. «قازىرگى تاڭدا سالالىق بيزنەس قاۋىمداستىقتار وكىلدەرىمەن كەزدەسۋلەر ۇيىمداستىرىلىپ جاتىر. كەزدەسۋ بارىسىندا كاسىپكەرلەر ءوز سالاسىنا قاتىستى ماسەلەلەردى ورتاعا سالىپ جاتىر. سونىمەن قاتار كاسىپكەرلەر ماسەلەنى شەشۋدىڭ جولدارىن ۇسىنۋدا»، - دەيدى ول.

ايتا كەتەيىك، كاسىپكەرلەرگە ارنالعان جەدەل شتاب تاۋلىك بويى جۇمىس ىستەيدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى