تۇركيا ءۇشىنشى جىل قاتارىنان قازاقستانعا رەكوردىق ينۆەستيتسيالار سالىپ كەلەدى
بۇل تۋرالى ق ر پرەمەر-ءمينيسترى ءاليحان سمايىلوۆ ايتتى، دەپ حابارلايدى قازاقپارات ءتىلشىسى.
«تۇركيا - قازاقستاننىڭ ەڭ سەنىمدى ساۋدا-ەكونوميكالىق جانە ينۆنستيتسيالىق سەرىكتەستەرىنىڭ ءبىرى. وتكەن جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 33 پروتسەنتكە ءوسىپ، 4,1 ميلليارد دوللاردان استى. سوڭعى 15 جىلدا تۇركيا ەل ەكونوميكاسىنا 3,5 ميلليارد دوللاردان استام ينۆەستيتسيا سالعان. قازاقستان رەسپۋبليكاسى تاراپىنان تۇركياعا 1 ميلليارد دوللاردان استام ينۆەستيتسيا باردى»، - دەدى ءا. سمايىلوۆ «Rixos President Astana» قوناق ۇيىندە قازاقستان-تۇركيا بيزنەس-فورۋمىندا.
ۇكىمەت باسشىسى تۇرىك ينۆەستورلارىنىڭ قازاقستانعا دەگەن قىزىعۋشىلىعىنىڭ ايتارلىقتاي وسكەنىن اتاپ ءوتتى. پاندەمياعا قاراماستان ءۇشىنشى جىل قاتارىنان قازاقستانعا تۇركيادان رەكوردىق كولەمدە ينۆەستيتسيالار سالىندى.
«وتكەن جىلدىڭ 9-ايىنىڭ قورىتىندىسى بويىنشا تۇركيالىق تىكەلەي شەتەلدىك ينۆەستيتسيالار ەكى ەسەگە ارتىپ، 535 ميلليون دوللاردى قۇرادى. بۇل قازاقستانعا دەگەن ۇلكەن سەنىمنىڭ بەلگىسى، ءارى ءبىزدىڭ ەلىمىزدەگى وڭتايلى ينۆەستيتسيالىق احۋالدىڭ كورىنسى. قازاقستان COVID-19 پاندەمياسىنا بايلانىستى ەكونوميكالىق قيىنشىلىقتاردى ءساتتى ەڭسەردى. وتكەن جىلدىڭ قورىتىندىسى بويىنشا ەكونوميكالىق ءوسىم 4 پروتسەنتتى قۇراپ، ونەركاسىپتىڭ پاندەمياعا دەيىنگى كورسەتكىشتەرىنەن اسىپ ءتۇستى. ناقتى سەكتور ونەركاسىپتىڭ درۆايۆەرى بولدى. ونەركاسىپ ءوسىمى 3,8 پروتسەنتتى قۇرادى. ونىڭ ىشىندە وڭدەۋ ونەركاسىبى 5,5 پروتسەنتكە ءوستى»، - دەدى ءاليحان سمايىلوۆ.
شيكىزاتتىق ەمەس سەكتورداعى جوعارى ينۆەستيتسيالىق بەلسەندىلىك ءوسىمنىڭ نەگىزگى فاكتورى بولدى. اتالعان سەكتورداعى ينۆەستيتسيالار 9,5 پروتسەنتكە وسكەن. 2021-جىلدىڭ 9 ايىنىڭ قورىتىندىسى بويىنشا قازاقستانعا كەلەتىن جالپى تىكەلەي شەتەلدىك ينۆەتسيتسيالار 50 پروتسەنتكە ارتىپ، 18,8 ميلليارد دوللاردى قۇرادى. سىرتقى سۇرانىستىڭ ارۋتى دا وسىمگە اسەر ەتتى.
تاۋار ەكسپورتى 27 پروتسەنتكە ارتتى، وڭدەلگەن تاۋارلار ەكسپورتى 32 پروتسەنتكە ءوسىپ، 19,8 ميلليارد دوللاردى قۇرادى. وڭ ساۋدا بالانسى وتكەن جىلعى دەڭگەيدەن 2,2 ەسەگە ارتتى.
ايتا كەتەيىك، ەلوردادا تۇركيا رەسپۋبليكاسىنىڭ ۆيتسە-پرەزيدەنتى فۋات وكتاي مىرزانىڭ قازاقستان رەسپۋبليكاسىنا ساپارى شەڭبەرىندە قازاقستان-تۇركيا بيزنەس-فورۋمى ءوتىپ جاتىر. قازاقستان مەن تۇركيا 68 تارماقتان تۇراتىن بىرلەسكەن ءىس-قيمىل جوسپارىن قابىلدادى.
وندا ساۋدا، ونەركاسىپ، ينۆەستيتسيا، كولىك پەن ترانزيت جانە تاعى باسقا سالالار قامتىلعان.
