قاراعاندى ينسپەكتورلارى بالىقتاردى قۇتقارۋ ءۇشىن مۇزدى تەسىپ، ساڭىلاۋ جاساپ جاتىر
بالىق قۇتقارۋ شارالارى اباي جانە بۇقار جىراۋ اۋداندارىندا كىشى سارىكول مەن پەتروۆكادا ۇيىمداستىرىلعان. ول ناۋرىز ايىنىڭ سوڭىنا دەيىن رەزەرۆتىك بالىق شارۋاشىلىعى سۋ ايدىندارىندا جالعاسادى. سۋدى وتتەگىمەن قانىقتىرۋ ءۇشىن ساڭىلاۋ جاساۋ قاجەت. قار مەن اياز - سۋداعى جانۋارلار ءۇشىن ناقتى پروبلەما. سەبەبى قالىڭ مۇز بەن قار جامىلعىسى سۋ وبەكتىلەرىنە وتتەگى مەن جارىقتىڭ تۇسۋىنە كەدەرگى بولادى، دەيدى ماماندار. بۇل بالىقتىڭ جاپپاي قىرىلۋىنا اكەلۋى مۇمكىن. مۇنداي قۇبىلىستاردىڭ الدىن الۋ ءۇشىن ساڭىلاۋلاردى بۇرعىلاۋ جانە ولاردى قامىسپەن تولتىرۋ ارقىلى بالىقتاردىڭ قىرىلۋىنىڭ الدىن الۋ شارالارى جۇزەگە اسىرىلادى. بۇل رەتتە اۋا وسىمدىكتەر ارقىلى سۋدىڭ تۇبىنە وتەدى.
«بالىق قۇتقارۋ جۇمىستارى جىل سايىن جانە تەك رەزەرۆتىك سۋ ايدىندارىندا جۇرگىزىلەدى. بەكىتىلگەن ساڭىلاۋلاردى تابيعات پايدالانۋشىلار بۇرعىلايدى. بۇگىنگى كۇنى مەملەكەتتىك ينسپەكتورلاردىڭ قورعاۋىندا 98 رەزەرۆتىك بالىق شارۋاشىلىعى سۋ ايدىنى بار»، - دەپ حابارلادى قاراعاندى وبلىسىنىڭ تابيعي رەسۋرستار جانە تابيعات پايدالانۋدى رەتتەۋ باسقارماسى.
بالىقتىڭ جاپپاي قىرىلۋىنا قارسى ءىس- شارالار سۋ جانۋارلارىنا سوڭعى ايازدى كۇندەردەن امان- ەسەن شىعۋعا جانە كوكتەمگى مۇزدىڭ ەرۋىن جانە سۋ وبەكتىلەرىنىڭ اشىلۋىن كۇتۋگە مۇمكىندىك بەرەدى.
