كىتاپ دۇكەندەرىندە قازاق اۆتورلارىنىڭ تۋىندىلارى نەگە از
ق ر ۇلتتىق كىتاپ پالاتاسىنىڭ ديرەكتورى ءادىل قويتانوۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«مەملەكەتتىك باعدارلامالارمەن شىعاتىن كىتاپتار وبلىس، اۋدان ورتالىقتارىنداعى كىتاپحانالارعا جەتكىزىلۋدە. ال ءبىراق ول كىتاپتار دۇكەندەرگە جەتپەيدى. سەبەبى باسپالاردىڭ باعدارلاما بويىنشا ورىندالعان تاپسىرىستىڭ ۇستىنە ارتىق تيراج شىعارىپ، ونى كىتاپ دۇكەندەرىنە وتكىزەتىن قۇقىقتارى جوق. سوندىقتان ءبىز بۇكىل باسپالارمەن اقىلداسىپ، وسى ماسەلەلەردى شەشۋ جولدارىن قاراستىرىپ جاتىرمىز»، - دەدى ول مادەنيەت جانە سپورت مينيسترلىگىنىڭ كەڭەيتىلگەن القا ماجىلىسىندە.
سونداي-اق، بۇل جاعىمسىز تەندەنتسيانىڭ سەبەپتەرىنە دە توقتالدى.
«سەبەبىن ىزدەيتىن بولسا، ارينە، ول نارىقتاعى كىتاپ ساتۋ جانە كىتاپ ساتىپ الۋ مادەنيەتىنە كەلىپ تىرەلەدى. رەسپۋبليكا تەرريتورياسىندا جۇمىسى جۇيەلەنگەن دۇكەندەردىڭ سورەلەرىندە قازاقستاندىق اۆتولاردىڭ، ونىڭ ىشىندە قازاق ادەبيەتىنىڭ بەلگىلى اقىن- جازۋشىلارىنىڭ ەڭبەكتەرى سيرەك كەزدەسەدى. ال «مەلومان» جەلىسىنىڭ باسشىلارىنىڭ ايتۋىنشا، ونداعى دۇكەندەردە ەلىمىزدە شىققان كىتاپتاردىڭ ۇلەسى ون-اق پايىز. «اتامۇرا»، «الماتى كىتاپ» باسپالارىنىڭ ءىرى وبلىس ورتالىقتارىندا ءوز دۇكەندەرى بار»، - دەگەن كىتاپ مامانى سوڭعى جىلدارى «قازىنا» كىتاپ دۇكەنى تەك قازاق ءتىلدى اۆتورلاردىڭ تۋىندىلارىن ساتاتىنىن ايتادى.
