تەلەارنادا «ساراي سىرى» تەلەحيكاياسى ەفيرگە شىعادى

تەلەحيكايا 1823-1845 -جىلدارى بوكەي ورداسىندا بيلىك قۇرعان تاريحي تۇلعا جاڭگىر حانعا قاتىستى وقيعالارعا نەگىزدەلگەن، دەپ حابارلايدى قازاقپارات ءتىلشىسى.

تۋىندىدا جاڭگىر حاننىڭ تۇلعاسى XVIII عاسىردىڭ سوڭى مەن XIX عاسىردىڭ ورتاسىندا بوكەي ورداسىنىڭ تاريحىندا بولعان وقيعالار جەلىسى ارقىلى كورسەتىلەدى. ساياسي ارەناداعى رولىمەن بىرگە، حالىقتى بىلىمگە تارتۋعا باعىتتالعان باستامالارى، قازاق دالاسىنا باتىس وركەنيەتىنىڭ كەلۋىنە سەبەپكەر بولۋى، بيلەۋشى سارايىنداعى ىشكى ءومىرى تەلەحيكايانىڭ نەگىزگى يدەياسى رەتىندە الىندى.

«ورىنبور جانە ۋفا قالالارى ءمۇفتيىنىڭ قىزى فاتيما حانشانىڭ حان ورداسىنا كەلىپ تۇسۋىمەن حيكاياداعى شىتىرمان وقيعالار جاڭا ءورىس الادى. حاندىقتىڭ سوڭعى جىلدارىندا يساتاي مەن ماحامبەتتىڭ تۇلعاسىنا قاتىستى شيەلەنىسكە تولى تاريحي وقيعالار دا قامتىلعان. بۇل وقيعالاردىڭ كوپشىلىگى تاريحي شىندىق بولعانىمەن، تەلەحيكايادا كوركەم شىعارماعا ءتان ستيلمەن استاسا بەرىلەدى»، - دەيدى جوبا جەتەكشىسى ارمان سقابىل ۇلى.

تەلەحيكايانىڭ قويۋشى- رەجيسسەرى - باقىتتاس سانيتاس. سسەناري اۆتورلارى - ءجاميت كوشەربايەۆ، اسقار دۇيسەنبى جانە ارمان سقابىل ۇلى. تەلەحيكايانىڭ ءتۇسىرىلىم جۇمىستارى الماتى وبلىسى مەن الماتى قالاسىندا ءوتتى.

باستى كەيىپكەر جاڭگىر حان ءرولىن مەدعات ومىراليەۆ، فاتيما ءرولىن ءامينا مەكتەپبايەۆا، قازيما ءرولىن زارينا كارمەن، ءجۇزىم ءرولىن ۇلبولسىن شالقاروۆا، ماحامبەت بەينەسىن دارحان سۇلەيمەنوۆ، يساتاي ءرولىن نۇرلان ساعىنايەۆ، قالي سۇلتان ءرولىن فارابي ءابساماتوۆ سومداپ شىقتى. جاڭگىر حاننىڭ اناسى اتان حانشا بەينەسىندە تىنىشكۇل سۇلتانبەردييەۆا وينادى.

اكتەر نۇرلان ساعىنايەۆ كورەرمەنگە «Qazaqstan» تەلەارناسى تۇسىرگەن «اباي» تاريحي تەلەحيكاياسىنداعى وسپان بەينەسى ارقىلى تانىس بولسا، دارحان سۇلەيمەنوۆ «وربۇلاق شايقاسى» تەلەحيكاياسىندا قاراساي باتىردىڭ رولىمەن بەلگىلى.

«ساراي سىرى» تاريحي تەلەحيكاياسى «Qazaqstan» تەلەارناسىنان بۇگىننەن باستاپ دۇيسەنبى- جۇما ارالىعىندا 21:30-دا ەفيرگە شىعادى.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى