قازاقستان ءبىلىم بەرۋ سالاسى بويىنشا ەڭ ۇزدىك ەلدەر قاتارىنا كىردى

Ranking.kz ساراپشىلارى ءبىلىم بەرۋ سالاسىنداعى جۇمىسپەن قامتۋ دەڭگەيىن جانە مۇعالىمدەردىڭ جالاقىلارىن سالىستىرىپ كوردى، - دەپ حابارلايدى Tengrinews.kz ءتىلشىسى.

ساراپشىلار پىكىرىنشە، رەيتينگ كوشباسشىلارى ا ق ش، ۇلى بريتانيا جانە گەرمانيا بولدى. ءبىلىم بەرۋ سالاسى بويىنشا رەيتينگتە گۆاتەمالا - ەڭ سوڭعى. رەيتينگكە قاتىساتىن تمد ەلدەرى ىشىندە قازاقستان تەك وزبەكستاندى باسىپ وزدى. رەسەي، ۋكراينا، بەلارۋس جانە ءازىربايجان قازاقستاننان الدا بولدى.

2021 -جىلدىڭ ءتورتىنشى توقسانىندا ءبىلىم بەرۋ سالاسى قىزمەتكەرلەرىنىڭ ورتاشا ايلىق جالاقىسى 219,2 مىڭ تەڭگە بولدى، بۇل ءبىر جىل بۇرىنعىعا قاراعاندا 24,2 پايىزعا ارتىق.

قازاقستاندا ورتاشا ايلىق جالاقى 275,6 مىڭ تەڭگەگە جەتتى، بۇل ءبىلىم بەرۋ سالاسىنا قاراعاندا 25,7 پايىزعا ارتىق.

سەكتورداعى ەڭ جوعارى جالاقىنى جوعارى وقۋ ورنى قىزمەتكەرلەرى (299 مىڭ تەڭگە)، ەڭ تومەن جالاقىنى مەكتەپكە دەيىنگى ءبىلىم بەرۋ مەكەمەلەرىنىڭ قىزمەتكەرلەرى (112,6 مىڭ تەڭگە) الادى.

ورتا ءبىلىم بەرۋ سەكتورىندا قىزمەتكەرلەر 246,9 مىڭ تەڭگە، قوسالقى ءبىلىم بەرۋ سالاسىندا 203,7 مىڭ تەڭگە، باستاۋىش ءبىلىم بەرۋ مەكەمەلەرىندە 180,1 مىڭ تەڭگە، ءبىلىم بەرۋدىڭ وزگە سالالارىندا قىزمەتكەرلەر 175,4 مىڭ تەڭگە الادى.

وڭىرلەر بويىنشا ەڭ كوپ جالاقى الاتىن ەلوردا قىزمەتكەرلەرى، ولار 344,5 مىڭ تەڭگە الادى. بۇل ءبىر جىل بۇرىنعىعا قاراعاندا 15,7 پايىزعا ارتىق. كوشباسشىلار ۇشتىگىنە الماتى (265,4 مىڭ تەڭگە) جانە الماتى وبلىسى (247,4 مىڭ تەڭگە) كىردى. باتىس قازاقستان وبلىسىندا ءبىلىم بەرۋ سالاسى قىزمەتكەرلەرىنىڭ جالاقىسى ەڭ از، 181,7 مىڭ تەڭگە الادى.

بىلتىر ءتورتىنشى توقساندا سالادا 1,1 ميلليون ادام جۇمىس ىستەدى، بۇل ءبىر جىل بۇرىنعىمەن سالىستىرعاندا ءبىر پايىزعا ارتىق.

ءبىلىم بەرۋ سالاسىندا جۇمىسپەن قامتىلعانداردىڭ كوپشىلىگى تۇركىستان وبلىسىندا - 142,9 مىڭ ادام، جىلدىق ءوسىم - 3,2 پايىز. كوشباسشى وڭىرلەر ۇشتىگىنە الماتى وبلىسى (128,6 مىڭ ادام) جانە الماتى (91,2 مىڭ ادام) كىردى.

جۇمىسپەن قامتىلعانداردىڭ ەڭ ازى سولتۇستىك قازاقستان وبلىسىندا تىركەلدى، جالپى سانى - 35,2 مىڭ ادام.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى